რუსული სარაკეტო დარტყმის შედეგად სოფელ გროზაში დაღუპულ მშვიდობიან მოსახლეთა რაოდენობა 55-მდე გაიზარდა.
"გასულ 24 საათში კიდევ ორი ქალის სხეულის ამოცნობა გახდა შესაძლებელი. აქამდე ისინი უგზო-უკვლოდ დაკარგულებად ითვლებოდნენ". – განაცხადა ხარკოვის ოლქის პროკურატურის წარმომადგენელმა დმიტრი ჩუბენკომ.
გროზაში დაღუპულთა რიცხვი ამ ეტაპზე საბოლოო არ არის. შინაგან საქმეთა სამინისტროს ცნობით ამ დროისთვის იდენტიფიცირებულია 51 ადამიანი, სპეციალისტებმა უკვე ჩაატარეს 168 დნმ-ის ანალიზი და კიდევ 61 ანალიზის პასუხებს ელოდებიან. უგზო-უკვლოდ დაკარგულად ითვლება 3 ადამიანი.
5 ოქტომბერს რუსმა ოკუპანტებმა ხარკოვის ოლქის სოფელ გროზაზე სარაკეტო იერიში მიიტანეს. შედეგად განადგურდა კაფე, რომელშიც ათობით ადამიანი იმყოფებოდა. კაფეში ადამიანები ქელეხს ესწრებოდნენ. სულ დაბომბვისას 52 მშვიდობიანი მოქალაქე დაიღუპა. სულ სოფელ გროზაში 330 ადამიანი ცხოვრობს, სარაკეტო იერიშს ყოველი მეშვიდე მაცხოვრებელი შეეწირა. დაღუპულთა შორის არიან ბავშვებიც.
საჰაერო თავდასხმას გამოეხმაურა უკრაინის პრეზიდენტი, ვოლოდიმირ ზელენსკიც, რომელმაც იერიშს საჩვენებელი სასტიკი რუსული დანაშაული უწოდა.
"საჩვენებელი სასტიკი რუსული დანაშაული – სარაკეტო დარტყმები ჩვეულებრივ სასურსათო მაღაზიაზე, აბსოლუტურად შეგნებული ტერაქტია. ხარკოვის ოლქის კუპიანსკის რაიონი. ამჟამინდელი მონაცემებით, ცნობილია 49-ზე მეტი დაღუპულის შესახებ. დაშავებულები დახმარებას იღებენ, ტერორისტებს კი, ვუპასუხებთ, აბსოლუტურად სამართლიანად და მძლავრად. ყველა, ვინც რუსეთს სანქციების გვერდის ავლაში ეხმარება, დამნაშავეა. ყველა, ვინც რუსეთს ამ დრომდე მხარს უჭერს, მხარს უჭერს ბოროტებას. მსგავსი ტერაქტები რუსეთს სჭირდება მხოლოდ ერთისთვის, აქციოს თავისი გენოციდური აგრესია ახალ ნორმად მთელი მსოფლიოსთვის. მადლობელი ვარ ყველა ლიდერის, ყველა ერის, რომელიც მხარს გვიჭერს სიცოცხლის დაცვაში".
ხარკოვის ოლქში 6-8 ოქტომბერი გლოვის დღეებად გამოცხადდა.
ევროკავშირის უმაღლესმა წარმომადგენელმა საგარეო პოლიტიკისა და უსაფრთხოების საკითხებში, ჯოზეფ ბორელმა 5 ოქტომბრის ხარკოვის დაბომბვას ომის დანაშაული უწოდა.
6 ოქტომბერს ავსტრიის საგარეო საქმეთა სამინისტრომ დაბომბვის საკითხზე რუსეთის ელჩი დაიბარა.
გაეროს სპეციალურ სხდომაზე რუსეთის ელჩმა განაცხადა, რომ კაფეში უკრაინელი ნაციონალისტები იმყოფებოდნენ.
