მამულაშვილი: სააკაშვილი რუსეთის ტყვეა და უკრაინაში აყვანილ რუს ტყვეებზე უნდა გაიცვალოს

ჩვენი ოკუპანტის, რუსეთის მთავარი მტერი, მიხეილ სააკაშვილი ციხეში კვდება. მისი გადაყვანისა თუ არ გადაყვანის გადაწყვეტილებას იღებს არა სასამართლო, არა კობახიძე, არა ივანიშვილი, არამედ, რუსეთის ხელისუფლება, ვლადიმირ პუტინი. ყველანაირი იმედი, რომ საქართველოს პრეზიდენტი, სალომე ზურაბიშვილი მიხეილ სააკაშვილს შეიწყალებს, ფუჭია. ზურაბიშვილი დღეს იმავე მორალურ პოზიციაზეა, რაზეც 1992 წლის 7 იანვარს იყო, როცა მან თენგიზ კიტოვანს, ჯაბა იოსელიანსა და თენგიზ სიგუას კანონიერი ხელისუფლების დამხობისთვის მადლობა გადაუხადა [...] სწორედ ამიტომ, მე მინდა, მივმართო უკრაინის პრეზიდენტს, ვოლოდიმირ ზელენსკისა და უკრაინის ხელისუფლებას. მიხეილ სააკაშვილი არის რუსეთის ტყვე. ის უბრალოდ ფიზიკურად იმყოფება საქართველოში. ის, როგორც უკრაინის მოქალაქე, უკრაინის მთავრობამ ტყვეების გაცვლის პრინციპის მიხედვით უნდა გამოიხსნას. მიხეილ სააკაშვილი უკრაინაში აყვანილ რუს ტყვეებზე უნდა გაიცვალოს. ამ თხოვნით მივმართავთ უკრაინის პრეზიდენტსა და უკრაინის მთავრობას, რომლებთანაც აქტიურ შეხვედრებსაც უმოკლეს დროში დავიწყებთ.