აშშ-ს პრეზიდენტმა, ჯო ბაიდენმა გასცა ბრძანება, სირიაში იერიში მიეტანათ ირანის მხარდაჭერილ ჯგუფებზე, ჩრდილო-აღმოსავლეთ სირიაში აშშ-ს სამხედროების ბაზის მიმდებარედ რაკეტების ჩამოვარდნიდან თითქმის ერთი კვირის შემდეგ. აშშ-მ საჰაერო თავდასხმა 23 აგვისტოს განახორციელა.
აშშ-მ იერიში სირიის დაირ-ელ-ზავრის რეგიონში მიიტანა. სამიზნე ირანის რევოლუციური გვარდიის კორპუსთან კავშირში მყოფი ჯგუფების ინფრასტრუქტურა იყო.
"ამ ზუსტი დარტყმების მიზანი არის აშშ-ს ძალების დაცვა ირანის მხარდაჭერილი ჯგუფების მიერ აშშ-ს სამხედროებზე 15 აგვისტოს მსგავსი თავდასხმებისგან". – თქვა შეერთებული შტატების ცენტრალური სარდლობის სპიკერმა, პოლკოვნიკმა ჯო ბუჩინომ.
ბუჩინომ CNN-თან თქვა, რომ იერიში მიიტანეს ბუნკერებზე, რომლებიც განკუთვნილი იყო ტყვია-წამლის შესანახად და ლოჯისტიკური დახამარებისთვის.
მისივე თქმით, 400 საათზე ხანგრძლივი დაზვერვის განმავლობაში აკვირდებოდნენ მთელი სისტემის 13 ბუნკერს. ბუჩინოს თქმით, იერიში მხოლოდ 11 მათგანზე უნდა მიეტანათ, რადგან არ იცოდნენ დანარჩენ 2 შენობაში ადამიანები იმყოფებოდნენ თუ არა. საბოლოოდ, იერიში მხოლოდ 9 ბუნკერზე მიიტანეს, რადგან კიდევ ორი სამხედრო ინფრასტრუქტურის მახლობლად ხალხის მცირე ჯგუფი იყო.
ბუჩინოს თქმით, იერიშს მსხვერპლი არ მოჰყოლია. მიზანი ბუნკერების განადგურება იყო.
ამჟამად აშშ-ს სირიაში მხოლოდ 900-მდე სამხედრო ჰყავს.
