საქართველო-რუსეთი

დაწესდეს სავიზო რეჟიმი რუსეთის მოქალაქეებისთვის – არასამთავრობო ორგანიზაციები

არასამთავრობო ორგანიზაციები და სამოქალაქო აქტივისტები ერთობლივი განცხადებით მოითხოვენ, დაუწესდეს სავიზო რეჟიმი საქართველოში შემომავალ რუსეთის მოქალაქეებს და გადაიხედოს ქვეყნის ტერიტორიაზე უკვე შემოსულ პირთა სამართლებრივი სტატუსი.

"საზოგადოებისთვის ცნობილია, რომ 2022 წლის იანვარ-ივნისის პერიოდში, საქართველოში რუსი ვიზიტორების შემოსვლის ტემპი მნიშვნელოვნად გაიზარდა. ამასთან, უკრაინაში რუსეთის შეჭრის შემდეგ, საქართველოში, 6 400-მდე რუსული კომპანია დარეგისტრირდა, რაც 2021 წლის წლიურ მაჩვენებელზე 7-ჯერ მეტია. მნიშვნელოვნადაა გაზრდილი რუსული ექსპორტი, ხოლო რუსეთის მოქალაქეებისა და ბიზნესის მასობრივი შემოდინება ცხადად მიუთითებს, რომ ოკუპანტი სახელმწიფოს მოქალაქეებს, თავისუფლად შეუძლიათ, ოკუპირებული საქართველოს გამოყენებით, თავი დააღწიონ რუსეთის ფედერაციის წინააღმდეგ დაწესებული სანქციების გამო შექმნილ რთულ ეკონომიკურ ვითარებას". – ნათქვამია ორგანიზაციების განცხადებაში.

NGO-ები მიიჩნევენ, რომ საქართველოში შემომავალი რუსეთის მოქალაქეებისა და ბიზნესის კონტროლი ქვეყნის ეროვნული უსაფრთხოების საკითხია. მათი განცხადებით, განგრძობადი ოკუპაცია, რუსეთის ფედერაციის მიერ საქართველოში ჩადენილი ეთნიკური წმენდა, ადამიანურობის წინააღმდეგ მიმართული დანაშაულები, უკრაინაში მიმდინარე კონფლიქტი  და რუსეთის ფედერაციის მიერ ხშირად გამოყენებული მიდგომა – საკუთარი მოქალაქეების ე.წ. დაცვის საბაბით, უცხო ქვეყანაში ინტერვენციასთან დაკავშირებით – საკმარის საფუძველს ქმნის სავიზო რეჟიმის დასაწესებლად.

"საქართველოს ტერიტორიაზე უცხო ქვეყნის მოქალაქეების დაშვება ნებისმიერი ქვეყნის ფართო დისკრეციას მოიაზრებს. ნებისმიერ დამოუკიდებელ ქვეყანას უფლება აქვს,  გადაწყვიტოს, რომელი სახელმწიფოს მოქალაქეებს აქვთ ქვეყანაში შემოსვლის, გადაადგილებისა და სიკეთეებით სარგებლობის უფლება. გარდა ამისა, აპრობირებული პრაქტიკაა, რომ ოკუპანტი და მტრულად განწყობილი ქვეყნის მოქალაქეებს, შეეზღუდოთ გარკვეული უფლებებით სარგებლობა, რაც თავსებადია ადამიანის უფლებების საერთაშორისოდ დადგენილ სტანდარტებთან". – ნათქვამია განცხადებაში.

ამასთან, არასამთავრობო ორგანიზაციები მიუთითებენ, რომ პოლიტიკური თავშესაფრისა და ლტოლვილის სტატუსის მიღება აღიარებული და დარეგულირებულია საერთაშორისო-სამართლებრივი ინსტრუმენტებით, რომელთა გამოყენება ხდება ინდივიდუალურად, ყოველ კონკრეტულ შემთხვევაში, მთელი რიგი გარემოებების გათვალისწინებით. შესაბამისად, აღნიშნული წესები ვერ იქნება სავიზო რეჟიმის დაწესების  საწინააღმდეგოდ გამოყენებული.

განცხადებას ხელს აწერენ:

  • საქართველოს ღია საზოგადოების ფონდი
  • ადამიანის უფლებათა ცენტრი
  • მედიაომბუდსმენი
  • სირცხვილია
  • საქართველოს პენცენტრი
  • სამოქალაქო საზოგადოების ინსტიტუტი
  • საქართველოს ახალგაზრდა იურისტთა ასოციაცია
  • სამართლიანი არჩევნები
  • თანასწორობის მოძრაობა
  • უფლებები საქართველო
  • ქალთა ინიციატივების მხარდამჭერი ჯგუფი WISG  
  • ევროპის ფონდი
  • ადვოკატთა და იურისტთა საერთაშორისო
  • ობსერვატორია
  • საფარი
  • დემოკრატიის მცველები
  • სოციალურ მეცნიერებათა ცენტრი
  • საქართველოს სასამართლოს გუშაგი (Court Watch)
  • მწვანე ალტერნატივა
  • დემოკრატიის ინდექსი – საქართველო
  • პლატფორმა "გამზირი"
  • ბი-ჯი-აი ედვაიზორი სერვისის ჯორჯია
  • საქართველოს დემოკრატიული ინიციატივა
  • SEED საქართველო
  • სამირა ბაირამოვა
  • საქართველოს სტრატეგიისა და საერთაშორისო ურთიერთობების კვლევის ფონდიც უერთდება
  • ეკონომიკური პოლიტიკის კვლევის ცენტრი
  • მიხეილ გელაშვილი
  • მარიამ მაგულარია
  • არჩილ ჩოფიკაშვილი- სამართლის მაგისტრი, საერთო და არასრულწლოვანთა მართლმსაჯულებაში სპეციალიზებული მენტორი ადვოკატი, სსიპ "საქართველოს ადვოკატთა ასოციაციის" დამფუძნებელი წევრი,  ა(ა)იპ "უფლებები საქართველოს" (კონსტიტუციის 42-ე მუხლი) იურისტი.

2022 წლის მეორე კვარტალში, აპრილ-ივნისის პერიოდში საქართველოში ვიზიტორების ყველაზე დიდი რაოდენობა, 147.7 ათასი რუსეთის ფედერაციიდან შემოვიდა, რაც ვიზიტორების ჯამური რაოდენობის 19.3%-ს შეადგენს.

კომენტარები