ჯანდაცვის მინისტრის პირველი მოადგილის, თამარ გაბუნიას თქმით, ქვეყანაში ომიკრონის შტამის პიკი გადავლილია და ეპიდსიტუაცია "დაღმასვლისკენ" მიდის. ამის შესახებ გაბუნიამ საკოორდინაციო საბჭოს სხდომის დასრულების შემდეგ ისაუბრა.
"დღეს 12 000-ზე ოდნავ მეტი შემთხვევა დაფიქსირდა, რაც უკვე მიუთითებს, რომ პიკი გადავლილია ომიკრონის ტალღის და ჩვენ მივიდვართ დაღმასვლისკენ. კლინიკურ სექტორში 8 000-ზე მეტი საწოლია მობილიზებული და აქაც იკლებს პაციენტების რაოდენობა, 5 165 პაციენტი მკურნალობს, დღევანდელი მდგომარეობით". – ამბობს თამარ გაბუნია.
საკოორდიანციო საბჭოს გადაწყვეტილებით, 1-ლი მარტიდან ქვეყანაში საკარანტინე სივრცეები – კოვიდსასტუმროები გაუქმდება. ასევე უქმდება შეზღუდვა ქორწილებისა და ქელეხების გამართვაზე. საბჭოს გადაწყვეტილებით, კვების ობიეტებში მაგიდასთან სტუმრების რაოდენობა იზრდება – დახურულ სივრცეში ერთ მაგიდასთან დაშვებულ პირთა რაოდენობა 10-მდე გაიზარდა, ნაცვლად 6-სა, ხოლო ღია სივრცეში 15 ადამიანამდე.
გასულ დღე-ღამეში COVID 19-ით კიდევ 45 ადამიანი გარდაიცვალა, დადასტურდა 12 101 ახალი შემთხვევა, ხოლო გამოჯანმრთელდა 14 764 ადამიანი.
დადებითობის დღიური მაჩვენებელია 25.48%, ბოლო 14 დღის მანძილზე - 30.65%, ხოლო 7 დღის მანძილზე - 28.55%.
კორონავირუსის გავრცელებიდან დღემდე, ქვეყანაში დადასტურდა ინფიცირების 1 565 769 შემთხვევა, მათგან გამოჯანმრთელდა 1 422 540 პაციენტი და გარდაიცვალა – 15 933.
