ჯანდაცვის სამინისტროს განცხადებით, სოციალური აგენტების და სოციალური მომსახურების სააგენტოს თანამშრომლების ანაზღაურება თებერვლიდან გაიზრდება. სამინისტროს განმარტებით, ანაზღაურების ზრდა შეეხება როგორც ფიქსირებულ, ისე გამომუშავებით კომპონენტს.
სამინისტროს გადაწყვეტილებით, სოციალური აგენტის ფიქსირებული ანაზღაურება 60%-მდე გაიზრდება. კერძოდ, 250 ლარის ნაცვლად 400 ლარი გახდება, უფროსი სოციალური აგენტის კი – 550 ლარის ნაცვლად 700 ლარი. ოჯახებში შესრულებული ვიზიტების ფარგლებში, ერთ შევსებულ დეკლარაციაზე სოციალური აგენტები 6 ლარის ნაცვლად 10 ლარს მიიღებენ.
ასევე, სამინისტროს განცხადებაში აღნიშნულია, რომ სოციალური მომსახურების სააგენტოს დაბალი და საშუალო რგოლის 1 000-მდე თანამშრომელს შრომის ანაზღაურება 40%-დან 60 %-მდე გაეზრდება.
სოციალური მომსახურების სააგენტოს თანამშრომლები სამუშაო პირობებსა და ანაზღაურებას აპროტესტებენ. 14 იანვარს მათ ანაზღაურების 100%-ით მომატება მოითხოვეს, წინააღმდეგ შემთხვევაში კი სააგენტოს 390-მა თანამშრომელმა 17 იანვრიდან გაფიცვა დააანონსა.
"დიდი პრობლემაა, რომ 15 წლის განმავლობაში სოციალური დაცვის სამინისტრო ადამიანებს 360 ლარზე ამუშავებს. მაქსიმალური ხელფასი არის 580 ლარი, ვითხოვთ გაორმაგებას. შეიძლება, 100% ვინმეს მოეჩვენოს, რომ რაღაც სასწაულ თანხაზე გავდივართ, მაგრამ 1 000 ლარზეც კი ვერ ავდივართ. არ შეიძლება ასეთი მოპყრობა". – თქვა სოციალური მომსახურების სააგენტოს ერთ-ერთმა თანამშრომელმა.