Toy Stories ფოტოგრაფ გაბრიელ გალიმბერტის პროექტია. ავტორი მსოფლიოს სხვადასხვა კუთხეში მოგზაურობისას ბავშვებს საყვარელ სათამაშოებთან ერთად ფოტოებს უღებდა.
წარმოგიდგენთ რამდენიმე ფოტოს და ისტორიას გალიმბერტის პროექტიდან.
თქვენს წინაშეა 4 წლის რალფი, ის რიგაში ცხოვრობს. დედამისი ტაქსის მძღოლია, რალფი დედას სამსახურში ხშირად დაყვება. მისი საყვარელი სათამაშოებია მანქანები. რალფი საათობით თამაშობს თავისი კოლექციით. რალფის წარმოსახვითი მძღოლები რთული რბოლების, დევნისა და სხვა საგზაო თავგადასავლების მონაწილეები ყოველდღიურად ხდებიან.
3 წლის ჩუნ ზი ი ჩინეთის ქალაქ ჩონგქინგში ცხოვრობს. მას არ აქვს გამორჩეული სათამაშო, ყველანაირი თამაში უყვარს. ასევე პატარა უკვე ძალიან კარგად ხატავს, მშობლებს იმედი აქვთ რომ ჩუნ ზისგან მხატვარი დადგება.
6 წლის ბეთსაიდა ჰაიტის ქალაქ პორტ-ო-პრინცში ცხოვრობს. ფოტო 2014 წელს არის გადაღებული. ორი წლით ადრე მიწისძვრამ მისი სახლი მიწასთან გაასწორა. ბეთსაიდა უსინათლო და სმენადაქვეითებულ მშობლებთან ერთად დევნილთა ბანაკში ცხოვრობს, რომელიც ქალაქარეთ ამერიკულმა არასამთავრობო ორგანიზაციამ ააშენა. იმავე ორგანიზაციისგან აქვს ბეთსაიდას სათამაშოებიც.
5 წლის ნიკო ალასკის მკვიდრია. მამამისი მეთევზეა, დედა კი პატარა სოფელში მასწავლებლად მუშაობს. ნიკოს ყველაზე მეტად კონსტრუქტორები, მათ შორის Lego უყვარს.
სიდნეიში მცხოვრები 3 წლის ლუკასს ყველაზე მეტად მატარებლებით თამაში უყვარს. მის კოლექციაში განსაკუთრებული ადგილი ხის მატარებელს უკავია, რადგან ლუკასს ძალიან მოსწონს მისი სუნი.
ფოტოგრაფის მიერ იმავე თემაზე გადაღებული ნამუშევრების ნახვა ამ ბმულზეა შესაძლებელი.
