ივერი მელაშვილის წინააღმდეგ ქართული ოცნების მიერ კოორდინირებული და ორგანიზებულ კამპანიაში საჯარო მოხელეების ჩართულობის დასადასტურებლად, ელენე ხოშტარია 100-ზე მეტ სქრინს აქვეყნებს.
ხოშტარია წერს, რომ ვიდეო, რომელსაც ისინი ავრცელებენ, იდენტურია - "ერთი ადამიანის მოჭრილი და ინსტრუქციად გაგზავნილი ასატვირთად".
"მესიჯები მსგავსი ან იდენტური: გარეჯი საქართველოა (ვითომ ვინმე ამბობს რომ არა), კონტექსტიდან ამოჭრილი მელაშვილის სიტყვები, ლანძღვა, თავდასხმა, გაზიარების მოწოდება.
ანუ ერთსა და იმავე დროს უცებ საქართველოს მასშტაბით სახელწმიფო მოხელეებმა, ზუსტად ერთსა და იმავე წამებში ვიდეო მოჭრეს, ერთნაირად და ერთდროულად გაბრაზდენ და 'იცავენ სამშობლოს"
რუსთავი, ყვარელი, ქუთაისი, ბოლნისი, ცაგერი, გარდაბანი, საჩხერე, ბათუმი, კასპი, ვანი, ჩხოროწყუ, ხობი, ზუგდიდი, თბილისი, წყალტუბო, ოზრუგეთი, მარნეული... სახელწმიფო მოხელეები, საკრებულოები, მერიები, აიპები და სიპები.
გარდა ივერი მელაშვილზე თავდასხმისა, ეს დაორგანიზებული გზავნილი ემსახურება მგრძნობიარე, პატრიოტულ თემაზე ტყუილზე დაფუძნებით კონფლიქტის გაღვივებას, რაც კიდევ უფრო საშიშია.
მესმის ადამიანების, ვინც უნებლიეთ წამოეგო პროვოკაციას, თუმცა ყველა დავფიქრდეთ, რას ემსახურება ოცნების მორიგი პროვოკაცია და კარგად დავფიქრდეთ სანამ დასკვნებს გამოვიტანთ და სისტემის მსხვერპლს დავესხმებით თავს" - წერს ელენე ხოშტარია თავის Facebook გვერდზე.
შეგახსენებთ, რომ სასამართლომ 28 იანვარს საქართველო-აზერბაიჯანის საზღვრის დემარკაციის კომისიის თავმჯდომარე და წევრი, ივერი მელაშვილი და ნატალია ილიჩოვა 20-20 000-ლარიანი გირაოს სანაცვლოდ გაათავისუფლა, მათ გირაო 30 დღის ვადაში უნდა გადაიხადონ. სასამართლომ პროკურატურის შუამდგომლობა ნაწილობრივ დააკმაყოფილა და ივერი მელაშვილი თანამდებობიდან გადააყენა. მოსამართლე ლელა კალოჩენკომ მიიჩნია, რომ თანამდებობაზე ყოფნა საქმეში არსებულ ინფორმაციას უკავშირდება და არა მხოლოდ ანაზღაურებას.
