ქვემო ქართლში კორონავირუსის 4 ახალი შემთხვევა დადასტურდა. სახელმწიფო რწმუნებულის, შოთა რეხვიაშვილის თქმით, პირები, რომლებსაც COVID 19 დაუდასტურდათ, თვითიზოლაციაში იმყოფებოდნენ და მათ კონტაქტები, ფაქტობრივად, არ აქვთ.
"4 ახალი შემთხვევაა ბოლნისში. 2 სამედიცინო კლასტერს უკავშირდება. სოფელ სავანეთში ოჯახის 2 წევრს დადასტურდა, ისინი თვითიზოლაციაში იყვნენ, კარანტინში. როგორც ერთ, ისე მეორე შემთხვევაში წინასწარ იყო პრევენციის ზომები მიღებული და კონტაქტები მინიმალური, პრაქტიკულად არც იყო ამ დღეების მანძილზე"- თქვა რეხვიაშვილმა
მისივე თქმით, ჯამში 75 დადასტურებული შემთხვევაა რეგიონში, აქედან 52 ბოლნისში, 15 მარნეულში და 8 - რუსთავში.
20 აპრილის მონაცემებით, საქართველოში კორონავირუსის 399 დადასტურებული შემთხვევაა გამოვლენილი. ინფიცირებულებიდან 93 გამოჯანმრთელდა, 4 კი გარდაიცვალა.
საკარანტინო სივრცეში 4 782 პირი რჩება, სტაციონარში მეთვალყურეობის ქვეშ კი - 503.
