ახალი კორონავირუსის გამო არაერთ ქვეყანაში საგანგებო მდგომარეობაა გამოცხადებული. მსოფლიო ჯანდაცვის ორგანიზაცია მოსახლეობას სახლში დარჩენისა და თვითიზოლაციისკენ მოუწოდებს.
წარმოგიდგენთ ხუთ წიგნს, რომელშიც რეალურად არსებული ან ავტორიის მიერ გამოგონილი ეპიდემიაა აღწერილი.
ემილი სეინთ ჯონ მენდელი - Station Eleven
მრავალი გამოცემის აზრით უკანასკნელი დეკადის ერთ-ერთი საუკეთესო წიგნის მოქმედება პოსტაპოკალიპტიკურ სამყაროში ვითარდება. კაცობრიობა გრიპმა მეტსახელად ჯორჯია გაანადგურა. მსახიობებისა და მუსიკოსების გაერთიანება "მოხეტიალე სიმფონია" ცივილიზაციის ნარჩენებში მოგზაურობს და გადარჩენილი მოსახლეობისთვის წარმოდგენებს მართავს.
ახლო მომავალში წიგნის მიხედვით გადაღებულ სერიალსაც ვიხილავთ, ეკრანიზაციის უფლება ტელეარხმა HBO მოიპოვა.
რენდი შილტსი - And The Band Played On
კვინტესენციური წიგნი 80-იანი წლების შიდსის კრიზისს ასახავს. ავტორი დეტალურად აღწერს ეპიდემიის პირველ წლებს და იმ მიზეზების ანალიზს ცდილობს, რომლებმაც ამერიკის საზოგადოება კატასტროფულ შედეგამდე მიიყვანა. რენდი შილტსი 1994 წელს შიდსისგან გამოწვეული გართულებებით გარდაიცვალა. წიგნის მიხედვით 1993 წელს გადაღებულ სატელევიზიო ფილმში მთავარ როლებს მეთიუ მოდაინი და იან მაკკელენი ასრულებენ.
რიჩარდ პრესტონი - The Hot Zone
წიგნი რამდენიმე ნაწილად არის დაყოფილი. თითოეულ თავში სხვადასხვა ვირუსების(ებოლა, მარბურგის ვირუსი, სუდანის ვირუსი და სხვა) წარმოქმნისა და გავრცელების ისტორიებია გადმოცემული. გახმაურებულ ბესტსელერს საშინელებათა ჟანრის ერთ-ერთი ყველაზე პოპულარული ავტორი სტივენ კინგიც გამოეხმაურა:"ჩემს მიერ წაკითხულ წიგნებს შორის The Hot Zone ერთ-ერთი ყველაზე სულისშემძვრელი ნამუშევარია."
ჯინა კოლატა - Flu
მეოცე საუკუნის დასაწყისში მომხდარი ესპანური გრიპის ეპიდემიის შესახებ დაწერილი წიგნი დეტექტიური ჟანრის საუკეთესო ტრადიციებშია გადაწყვეტილი. მთავარი გმირები ვირუსის წარმოქმნის თავდაპირველ მიზეზებს იკვლევენ. ავტორი New York Times-ის ჟურნალისტია, რომელმაც რომანის დაწერამდე ესპანურ გრიპზე დეტალური ისტორიული მოკვლევა ჩაატარა.
მერი შელი - The Last Man
სწორედ ამ წიგნის გამო, მერი შელი აპოკალიპტიკური ჟანრის პიონერად ითვლება. რომანის მოქმედება 21-ე საუკუნეში ვითარდება, საშინელი ეპიდემიის შედეგად მთავარი გმირი ოჯახისა და ახლობლების გარეშე, სრულიად მარტო რჩება. რომანი ავტორის ემოციების პირდაპირი ანარეკლია, წიგნის დაწერამდე ცოტა ხნით ადრე შელიმ ორი ძვირფასი ადამიანი - მეუღლე პერსი შელი და საუკეთესო მეგობარი ჯორჯ ბაირონი დაკარგა.