გარიგებული მატჩები ეროვნულ ლიგაში

გარიგებული მატჩებისთვის, სადისციპლინო კომიტეტმა 5 ფეხბურთელს საქმიანობა სამუდამოდ აუკრძალა

4 ივნისს, საქართველოს ფეხბურთის ფედერაციაში სადისციპლინო და საფეხბურთო დავების განმხილველი კომიტეტის სხდომა შედგა, რომელიც მიხეილ მესხის სახელობის სტადიონის საპრესკონფერენციო დარბაზში გაიმართა და რამდენიმე საათს გაგრძელდა.

კომიტეტმა მოისმინა მატჩის შედეგსა და მსვლელობაზე მანიპულირებაში ბრალდებული ფეხბურთელების საკითხი და მიიღო შემდეგი გადაწყვეტილება: თბილისის "ვიტ ჯორჯიას“ ხუთ მოთამაშეს, გიორგი გეთიაშვილს, ჯონი შეროზიას, ნიკოლოზ მაისურაძეს, ნოდარ კიკნაველიძესა და პაატა ღუდუშაურს სანქციის სახით დაეკისრათ საფეხბურთო საქმიანობის სამუდამო აკრძალვა. ხოლო თავად კლუბს დააკლდა ექვსი ქულა და დაჯარიმდა 50 ათასი ლარით.

კომიტეტმა ასევე იმსჯელა ლანჩხუთის "გურიას“ ორი მოთამაშის (რობერტ იმერლიშვილისა და ირაკლი ბაჯელიძის) საკითხზე, ასევე, "ჭიათურის" მოთამაშის (ირაკლი ხუჭუას) საკითხზე და დაადგინა: საბოლოო გადაწყვეტილების მიღებამდე, დროებით აეკრძალოთ საფეხბურთო მატჩებში მონაწილეობა.

შეგახსენებთ, რომ "ვიტ ჯორჯიას" ფეხბურთელები საქართველოს უსაფრთხოების სამსახურმა 19 მაისს, ბათუმის "დინამოსთან" (0:2) მატჩის დასრულებისთანავე ჩაწყობილი შეხვედრების ბრალდებით დააკავა. სუს-ის ცნობით, გარიგებულ მატჩებში მონაწილეობით, ფეხბურთელებმა დაახლოებით 100 ათასი ლარი აიღეს.

კომენტარები