"არ შეიძლება, რომ კომისიამ ჩაანაცვლოს საგამოძიებო სტრუქტურა და თავი შეიქოს იმითი, რომ გამოძიებას აჯობა," - უმრავლესობის ლიდერი გია ვოლსკი ოპოზიციის მიერ მიხეილ კალანდიას დაკავებასთან დაკავშირებით გაკეთებულ განცხადებებს აკრიტიკებს. მისი თქმით სერგი კაპანაძის მიერ დღეს გაკეთებული განცხადება არაკომპეტენტურია.
"ყოველგვარი ნიშნის მოგების გარეშე ვამბობ, რომ სერგი კაპანაძის განცხადება არაკომპეტენთურია სამართლებრივი თვალსაზრისით. არ შეიძლება, რომ კომისიამ ჩაანაცვლოს საგამოძიებო სტრუქტურა და თავი შეიქოს იმითი, რომ გამოძიებას აჯობა. სკანდალური განვითარება მიიღო თვითონ ამ შემთხვევამ, მაგრამ ასე ნუ ვიტყვით, რომ პოლიტიკური მოტივაცია იყო ამის მთავარი განმაპირობებელი. საკმაოდ რთული საკითხი იყო და დღესაც მე ვფიქრობ ეს სირთულე ჯერ კიდევ არ არის გადალახული და თუ რამე გამოძიებაში შეცდომაა ან მიკერძოებაა დაშვებული, ამას როგორც ხედავთ პასუხი ეძლევა და ეს პასუხი ზოგიერთ, მათ შორის გარკვეულ პოლიტიკურ ჯგიფებს რასაკვირველია არ მოსწონთ," - ამბობს ვოლსკი.
ევროპული საქართველოს წევრმა და საგამოძიებო კომისიის თავმჯდომარემ სერგი კაპანაძემ დღეს თქვა, რომ სწორედ მიხეილ კალანდიას დაკავება იყო საგამოძიებო კომისიის მიერ 2018 წელს გაცემული ერთერთი მთავარი რეკომენდაცია.
სარალიძის მკვლელობის საქმე
დავით სარალიძის ჯგუფურად, დამამძიმებელ გარემოებებში, მკვლელობისთვის მიხეილ კალანდია დღეს, 4 ივნისს დააკავეს.
შსს-მ თქვა, რომ თბილისის საქალაქო სასამართლოს განაჩენის მერე მოპოვებულმა მტკიცებულებებმა მკვლელობაში მიხეილ კალანდიას მონაწილეობის ეჭვი გაამყარა.
გასულ წელს, საგამოძიებო კომისიის სხდომებზე დაბარებული პროკურორები და შსს-ის თანამშრომლები ამბობდნენ, რომ "კალანდიას ქმედებასა და სარალიძის სიკვდილს შორის მიზეზობრივი კავშირი არ არის".
3 ივნისს თბილისის სააპელაციო სასამართლომ ხორავას ქუჩის საქმეზე გამოიტანა გადაწყვეტილება, რომლის მიხედვითაც, არასრულწლოვანი გ.ჯ დამნაშავედ ცნო დავით სარალიძის ჯგუფურად მკვლელობაში, დაუდგენელ პირთან ერთად.
გუშინდელი გადაწყვეტილებით გ.ჯ-ს ბრალი გადაუკვალიფიცირდა. 2018 წლის 31 მაისს თბილისის საქალაქო სასამართლოს მოსამართლე ეკა აროშიძემ ის მხოლოდ ლევან დადუნაშვილის მკვლელობაში ცნო დამნაშვედ, დავით სარალიძის საქმეზე კი გამოაცხადა, რომ გ.ჯ დამნაშავე იყო არა მკვლელობის, არამედ მკვლელობის მცდელობისთვის.
გ.ჯ-ს სააპელაციო სასამართლომ არასრულწლოვანთა მართლმსაჯულების კოდექსის თანახმად, საბოლოო სასჯელის სახით განესაზღვრა თავისუფლების აღკვეთა 11 წლის და 3 თვის ვადით.
რაც შეეხება მეორე ბრალდებულს, გ.ბ-ს - სააპელაციო სასამართლო დაეთანხმა ეკა აროშიძის 1 წლის წინანდელ გადაწყვეტილებას და თქვა, რომ ის მხოლოდ ლევან დადუნაშვილის მკვლელობაშია ბრალდებული, დავით სარალიძის მკვლელობის ნაწილში კი უდანაშაულოა.
მიუხედავად ამისა, სააპელაციო სასამართლომ მას მაინც დაუმძიმა სასჯელი და არასრულწლოვანთა მართლმსაჯულების კოდექსის თანახმად, საბოლოოდ განუსაზღვრა თავისუფლების აღკვეთა 11 წლის და 3 თვის ვადით.
თბილისის საქალაქო სასამართლოს გადაწყვეტილება მეორე ინსტანციაში ბრალდების მხარეს ჰქონდა გასაჩივრებული.
პროკურატურა ამბობდა, რომ ეკა აროშიძემ უკანონო გადაწყვეტილება მიიღო, როდესაც თქვა, რომ გ.ბ არ არის დამნაშავე დავით სარალიძის მკვლელობის ნაწილში. ბრალდების მხარე სააპელაციო სასამარლთოსგან სწორედ გ.ბ-ს დამნაშავედ ცნობას ითხოვდა.
საგამოძიებო კომისიის დასკვნა
საგამოძიებო კომისიამ, რომელიც 2018 წელს ხორავას ქუჩის მკვლელობის საქმესთან დაკავშირებით პარლამენტში შეიქმნა, მას შემდეგ, რაც მთავარი პროკურორი, მინისტრები, თვითმხილველები, ექსპერტები და საქმეში მონაწილე არასრულწლოვნები გამოკითხა, დაასკვნა, რომ:
გარემოებები მიუთითებს პროკურატურის მოტივაციაზე - მიეჩქმალათ მიხეილ კალანდიას როლი დავით სარალიძის ჯგუფურად მკვლელობაში და იგი ჩაენაცვლებინათ გ.ბ.-ით, რომელსაც ისედაც უმტკიცდებოდა ლევან დადუნაშვილის მკვლელობა.
ასევე, კომისია წერდა, რომ:
ხორავას ქუჩაზე მომხდარ ფაქტთან დაკავშირებით საწყის ეტაპზე დაიწყო საგამოძიებო მოქმედებები, ოპერატიულად მოხდა ჩხუბის მონაწილეების იდენტიფიცირება, მაგრამ საქმეში ა.ს.-ს მამის, მირზა სუბელიანის გამოჩენის შემდეგ გამოძიება წარიმართა ტენდენციურად, იმ განზრახვით, რომ პასუხისმგებლობა მომხდარ მკვლელობებზე დაკისრებოდათ მხოლოდ გ.ჯ.-ს და გ.ბ.-ს, ამასთან დაფარულიყო მიხეილ კალანდიას და სხვა ფიგურანტების როლი დავით სარალიძის მკვლელობაში.
ასევე, დასკვნის მიხედვით, აშკარად იკვეთება, რომ საგამოძიებო უწყებები ცდილობდნენ მიეჩქმალათ მირზა სუბელიანის მონაწილეობა დანაშაულის დაფარვა/შეუტყობინებლობასადა მტკიცებულებების განადგურებაში. ასევე, მათ არ ჩაატარეს საგამოძიებო მოქმედებები, რასაც, შესაძლოა, დანაშაულის ჩადენაში ემხილებინა მიხეილ კალანდია, ა.ს. და სხვა ფიგურანტები.
დარღვევებს შორის განსაკუთრებით აღსანიშნავია, რომ:
გამოძიებამ ხელი დააფარა მირზა სუბელიანის, მისი ოჯახის წევრებს და ნათესავებს, რაც გამოიხატა მიკერძოებულად ჩატარებულ საგამოძიებო მოქმედებებში;
გამოძიებამ არ გადაამოწმა დანაშაულში მიხეილ კალანდიას მონაწილეობის ვერსია და, მიუხედავად, მტკიცებულებათა ერთობლიობისა, პროკურატურამ მას ბრალი არ წარუდგინა დავით სარალიძის ჯგუფურ მკვლელობაში;
გამოძიებამ არ გამოავლინა საქმესთან დაკავშირებული მნიშვნელოვანი გარემოება - მიხეილ კალანდიას მიერ ჩხუბის დროს ე.წ. „ტარის“ ქონა, და დავით სარალიძის წინააღმდეგ მისი გამოყენება.
