ამერიკის შეერთებული შტატები მიიჩნევს, რომ შოტლანდიას დამოუკიდებლობა უარყოფით ეკონომიკურ შედეგებს მოუტანს. ამის შესახებ პრეზიდენტ ობამას ადმინისტრაციაში განაცხადეს.
"ვფიქრობ, რომ ძლიერი გაერთიანებული სამეფო მნიშვნელოვანია, რადგან ის დიდი ხანია, ერთ-ერთი საუკეთესო და სანდო პარტნიორია ჩვენთვის. ყურადღებით ვაკვირდებით, რა მოხდება", - თქვა ობამას ადმინისტრაციის წარმომადგენელმა.
შეგახსენებთ, რომ შოტლანდიაში რეფერენდუმი დაიწყო. უნდა იყოს თუ არა შოტლანდია დამოუკიდებელი ქვეყანა? - შოტლანდიაში მცხოვრებებს აღნიშნულ კითხვაზე "კი" ან "არა" პასუხების გაცემა შეუძლიათ.
რეფერენდუმში მონაწილეობის მისაღებად 4 285 323 ამომრჩეველია რეგისტრირებული.
შოტლანდიაში სულ 2608 საარჩევნო უბანია გახსნილი, რომლებიც, ადგილობრივი დროით, 22:00 საათზე დაიხურება. შედეგები, სავარაუდოდ, პარასკევს დილით გახდება ცნობილი.
