ერთიანმა ნაციონალურმა მოძრაობამ საპარლამენტო საქმიანობა შეწყვიტა. ამის მიზეზი თბილისის მერიისა და საკრებულოს წევრთა დაკავებებია. საგანგებო ბრიფინგზე ფრაქციის ერთ-ერთმა ლიდერმა, ლევან ბეჟაშვილმა განაცხადა, რომ საპარლამენტო უმცირესობა თბილისში დაბრუნდება.
"ნაციონალური მოძაობის მიმართ ხორციელდება უპრეცედენტო შეტევა. გუშინ დააკავეს ჩვენი პარტიის წევრები, ასევე რაიონალური ორგანიზაციის ლიდერები და რიგითი წევრები. ეს პირდაპირ უკავშირდება იმას, რომ ნაციონალური მოძრაობის წინააღმდეგ ხორციელდება უპრეცედენტო შეტევა. აქედან გამომდინარე, ჩვენ ვერ მივიღებთ მონაწილეობას საპარალამენტო საქმიანობაში, ვერ მივიღებთ მონაწილეობას ისეთი კანონპროექტების განხილვაში ასეთ ვითარებაში, როგორიც არის სერიალები და ა.შ.", - განაცხადა ლევან ბეჟაშვილმა.
მისივე თქმით, ყველა დაკავება, რომელიც გუშინ განხორციელდა, იყო საპროცესო კოდექსის უხეში დარღვევა.
"ჯერ ეს ადამიანები დააკავეს საპროცესო კოდექსის უხეში დარღვევით, შემდეგ ასევე უხეში დარღვევით გაათავისუფლეს და შემდეგ ისევ დარღვევით დააკავეს", - განაცხადა ლევან ბეჟაშვილმა.
როგორც დეპუტატი აცხადებს, ნაციონალური მოძრაობის გეგმები უახლოეს მომავალში გახდება ცნობილი.
