საქართველოს პრეზიდენტმა, მიხეილ სააკაშვილმა, აშშ-ში ოთხდღიანი ვიზიტის ბოლოს, გამოცემა Foreign Policy-ს ინტერვიუ მისცა. სააკაშვილი ინტერვიუში ბოსტონის ტერაქტზე საუბრობს და სასაცილოს უწოდებს პრემიერმინისტრ, ბიძინა ივანიშვილის განცხადებას, იმის შესახებ რომ წინა ხელისუფლებას, ტერორისტ ტამერლან ცარნაევთან ჰქონდა კავშირი.
მიხეილ სააკაშვილი აცხადებს, რომ ასეთი ’’უგუნური განცხადებები უცხოეთში საქართველოს იმიჯსა და პოზიციებს ზიანს მოუტანს’’.
"ეს სასაცილოა, თუმცა ორმაგად სასაცილოა, როცა ამას პრემიერმინისტრი ამბობს. რა თქმა უნდა, მათ აქვთ შიდა სამოქმედო გეგმა, მაგრამ პრობლემა ისაა, რომ ისინი ვერ არჩევენ შიდა სამოქმედო გეგმას იმ ზიანისგან, რაც მათ ქვეყნისთვის ოაქვთ. ისინი ცდილობენ, ამ ბინძური გზებით გააღვივონ ეჭვები წინა მთავრობაზე, თუმცა არ ფიქრობენ სხვა შედეგებზე, იმდენად უნდათ ჩვენთვის ძირის გამოთხრა, რომ ყველაფერს კადრულობენ. შესაძლოა, ისინი ფიქრობენ, ვაშინგტონში ისეთი გავლენა გვაქვს, რომ ჩვენი გავლენის შესარყევად, ყველაფრის გაკეთება შეუძლიათ. მთავარი აქ ისაა, რომ ეს ყველაფერი ქვეყანას აყენებს ზიანს და არა ინდივიდუალურ პოლიტიკოსებს. გარდა ამისა, ეს არ არის სიმართლე", - აცხადებს მიხეილ სააკაშვილი, ჯოშ როჯინთან ინტერვიუში.
მისივე თქმით, მსგავსი განცხადებები საქართველოს მოკავშირე ქვეყნებსაც ცუდ მდგომარეობაში აყენებს.
"ყველა ჩვენმა მოკავშირემ იცის, რა გავაკეთეთ ტერორიზმის წინააღმდეგ ბრძოლისთვის, მაგრამ ისინი შეწუხებული და შეშფოთებული არიან, რადგან ეს ის ქვეყნები არიან, რომლებიც მხარს გვიჭერდნენ. თუკი ახლა საქართველოს მთავრობა იტყვის, რომ სიმართლე სხვა რამეშია, რბილად რომ ვთქვათ, ეს უცნაურად ჟღერს. მაგრამ, ამავდროულად, ეს არამეგობრული განცხადებაა ჩვენი მოკავშირეებისთვის, რომელთაც ყველაფერი იღონეს, ჩვენი ამ სიტუაციიდან გამოყვანისთვის", - აცხადებს მიხეილ სააკაშვილი.
საქართველოს პრეზიდენტმა, 2008 წლის აგვისტოს ომის შესახებაც ისაუბრა და აღნიშნა, რომ პრემიერი ომის თემაზე თავისი განცხადებებით, რუსეთის მთავრობის რიტორიკას აძლიერებს.
"არ ვფიქრობ, რომ პრემიერმინისტრი ამას შეგნებულად აკეთებს. ჩემი აზრით, ის მისდევს იმ გამონათქვამებს, რასაც რუსი რადიკალები აცხადებენ. მისი გამონათქვამები ემთხვევა იმას, რასაც რუსი რადიკალები და თავად პუტინი აცხადებენ", - აღნიშნავს სააკაშვილი.
შეგახსენებთ, საქართველოს პეზიდენტი, სამუშაო ვიზიტით ამერიკის შეერთებულ შტატებში იმყოფებოდა, სადაც აშშ-ის ვიცეპრეზიდენტ ჯო ბაიდენს, სახელმწიფო მდივანს ჯონ კერისა და ყოფილ პრეზიდენტ ჯორჯ ბუშს შეხვდა.
საქართველოს პრეზიდენტი