სომალელი მეკობრეების ტყვეობიდან გათავისუფლებულ ქართველ მეზღვაურებს სტამბულში საქართველოს პრეზიდენტი მიხეილ სააკაშვილი და თურქეთის პრემიერ-მინისტრი რეჯეპ ტაიბ ერდოღანი დახვდნენ. მეზღვაურები კენიიდან სტამბულში ქართული დელეგაციის თანხლებით ჩავიდნენ. ისინი თურქეთიდან სამშობლოში პრეზიდენტთან ერთად, დღესვე, დაბრუნდებიან. მეზღვაურებს ახლობლები ბათუმში ელოდებიან.
15 ქართველი და 3 თურქი მეზღვაური სომალელი მეკობრეების ტყვეობაში თითქმის წელიწადნახევრი იმყოფებოდნენ. ტყვეობიდან მეზღვაურების გათავისუფლების შესახებ ინფორმაცია 8 იანვარს გავრცელდა. ოფიციალური ინფორმაციით, გათავისუფლებასთან დაკავშირებით მოლაპარაკებებს კენიაში ეკონომიკისა და მდგრადი განვითარების მინისტრის მოადგილე გიორგი კარბელაშვილი ხელმძღვანელობდა. მოლაპარაკებების პროცესში ის პრეზიდენტის ოფიციალური წარმომადგენელის სტატუსით სარგებლობდა.