Facebook- ში ”თავისუფალი დემოკრატების” ლიდერის ირაკლი ალასანიას პირად გვერდზე დღეს დილით გავრცელდა ცნობა, რომ თავისუფალი დემოკრატების ლიდერი ”ატლანტიკური საბჭოს” გამგეობის წევრი გახდა. ალასანია ამჯერად ამერიკის შეერთებულ შტატებში იმყოფება. ინფორმაციის დასაზუსტებლად ”ტაბულა ” თავისუფალ დემოკრატებს დაუკავშირდა. ვიქტორ დოლიძემ ტაბულასთან საუბრისას დაადასტურა გავრცელებული ცნობა და თქვა, რომ ალასანია გუშინ ნამდვილად გახდა ”ატლანტიკური საბჭოს” გამგეობის წევრი . ”ეს განსაკუთრებული სიახლე არ არის, შესაბამისი შემოთავაზება კარგა ხანია არსებობდა .”- აღნიშნა ალასანიას თანაპარტრიელმა.
ტაბულამ “თავისუფალი დემოკრატების” მიერ გავრცელებული ინფორმაცია ”ატლანტიკურ საბჭოში” გადაამოწმა. ორგანიზაციის აღმასრულებელმა ვიცე-პრეზიდენტმა, დეიმონ უილსონმა “თავისუფალი დემოკრატების" მიერ გავრცელებული ინფორმაცია უარყო და განმარტა : ” ირაკლი ალასანია ატლანტიკურ საბჭოში გაწევრიანდა. ის ორგანიზაციის გამგეობაში არ აურჩევიათ. ატლანტიკური საბჭო წევრობაზე დაფუძნებული ორგანიზაციაა და ბევრი უცხოელი წევრი ჰყავს, მათ შორის საქართველოდანაც. წევრებს შორის არიან: ალექსანდრე რონდელი, თემურ იაკობაშვილი, დავით სიხარულიძე და ბათუ ქუთელია.”
ატლანტიკური საბჭო ვაშინგტონში მოქმედი ანალიტიკური ორგანიზაციაა და მიზნად ისახავს ტრანსატლანტური თანამშრომლობისა და საერთაშორისო უსაფრთხოების ხელშეწყობას.
