” ქართუ ბანკის ” სამეთვალყურეო საბჭოს თავმჯდომარე ნოდარ ჯავახიშვილი ”საქართველოს ეროვნული ბანკის ” 1 ნოემბრის განცხადებას გამოეხმაურა . მის მიერ გავრცელებულ განცხადებაში ნათქვამია, რომ გრძელდება ”ქართუ ბანკზე” პოლიტიკურად მოტივირებული ზეწოლა, მათ შორის ”ეროვნული ბანკის ”მხრიდან, რომლის მიზანიცაა შექმნას რაიმე, ”თუნდაც უსაფუძვლო ” საბაბი ბანკში დროებითი ადმინისტრაციის შესაყვანად. ” სწორედ ამ მიზანს ემსახურება 18 ოქტომბრიდან გადადგმული ნაბიჯები, მათ შორის ის ერთი შეხედვით მხარდამჭერი განცხადებები, რომლითაც ”ეროვნული ბანკი” სთავაზობს ფინანსურ მხარდაჭერას კომერციულ ბანკს, როცა მას ამ ეტაპზე დახმარება არ სჭირდება” - ნათქვამია” ქართუ ბანკის” სამეთვალყურეო საბჭოს თავმჯდომარის განცხადებაში.
”საქართველოს ეროვნულმა ბანკმა” 1 ნოემბერს განაცხადა, რომ ”ქართუ ბანკს” ორგანული კანონით მინიჭებული უფლებამოსილებით ამოწმებს და შემოწმების მიმდინარეობისას საფრთხე არ ემუქრება კომერციული ბანკის სტაბილურ ფუნქციონირებას . ”ეროვნულმა ბანკმა” საკუთარ განცხადებაში აღნიშნა, რომ მზადაა საჭიროების შემთხვევაში განიხილოს ”ქართუს” კომპლექსური მხარდაჭერის საკითხიც. ”სამწუხაროდ ეროვნული ბანკის პოზიციას ”ქართუმ” თანამშრომლობის ნაცვლად უსაფუძვლო პოლიტიკური განცხადებებით უპასუხა , მიზანმიმართულად ფერხდება ჩვენი თანამშრომელთა ადგილზე მუშაობის პროცესი. ”-ნათქვამია ”საქართველოს ეროვნული ბანკის” განცხადებაში.
