უკრაინის შეიარაღებული ძალების უპილოტო სისტემების ძალების მეთაურმა რობერტ (მადიარ) ბროვდიმ, ბელარუსის მუქარების პასუხად თქვა, რომ უკრაინელმა სამხედროებმა უკვე განსაზღვრეს 500 სამიზნე ბელარუსის ტერიტორიაზე. ბროვდიმ ბელარუსის დიქტატორს, ალექსანდრ ლუკაშენკოს მოუწოდა, რომ უკრაინელებს "თვალში არ მოხვდეს".
"მინსკელ გაულაიტერ ლუკაშესკუს: მყეფავი ძაღლი არ იკბინება. მტაცებელი ფრინველი, ეს სხვა საქმეა. პირველი 500 სამიზნე უკვე ფანქრითაა მონიშნული. უფასო და ძალიან პრაქტიკული რჩევა: ნუ გაეჩხირებით უკრაინას თვალში." - თქვა ბროვდიმ.
მადიარმა ასევე უპასუხა რუსეთის საგარეო საქმეთა მინისტრ სერგეი ლავროვის მუქარებს, რომელმაც განაცხადა, რომ რუსეთი კიევში ობიექტებზე "სისტემურ დარტყმებს" გეგმავს.
უპილოტო სისტემების ძალების მეთაურმა გაიხსენა, რომ უკრაინული დრონების შეტევების შემდეგ 13 დაზიანებული რუსული ნავთობგადამამუშავებელი ქარხნიდან ცხრამ მუშაობა შეაჩერა.
აქამდე ბელარუსის თავდაცვის სამინისტრომ განაცხადა, რომ 18 მაისს ქვეყანაში ბირთვული იარაღის საბრძოლო გამოყენების ქვედანაყოფების წვრთნები დაიწყო. წვრთნები რუს სამხედროებთან თანამშრომლობით ტარდება.
უკრაინის საგარეო საქმეთა სამინისტრომ რუსეთის ტაქტიკური ბირთვული იარაღის ბელარუსში განთავსება და ორი დიქტატურის ერთობლივი ბირთვული წვრთნები გლობალური უსაფრთხოების არქიტექტურის უპრეცედენტო გამოწვევად შეაფასა და საერთაშორისო პარტნიორებს მკაცრი პასუხისკენ მოუწოდა.
20 მაისს შტაბის სხდომაზე გაანალიზდა უკრაინული დაზვერვის მონაცემები რუსეთის გეგმების შესახებ, რომლებიც ჩერნიგოვი-კიევის მიმართულებით შეტევითი ოპერაციების ჩატარებას ეხებოდა. პრეზიდენტმა განაცხადა, რომ ამ მიმართულებით უკრაინული ძალები გაძლიერდება.
ვოლოდიმირ ზელენსკიმ საგარეო საქმეთა სამინისტროს დაავალა ბელარუსის წინააღმდეგ დამატებითი დიპლომატიური ზემოქმედების ზომების მომზადება, რადგან რუსეთმა შესაძლოა ქვეყანა ომის გაფართოებისთვის გამოიყენოს.
