საფრანგეთის პრეზიდენტმა, ემანუელ მაკრონმა, ევროპული პოლიტიკური გაერთიანების სამიტზე გაერთიანებული სამეფოს პრემიერმინისტრ კირ სტარმერთან, იტალიის პრემიერმინისტრ ჯორჯა მელონისთან და ევროკომისიის პრეზიდენტ ურსულა ფონ დერ ლაიენთან ერთად გამართული პანელური დისკუსიის დროს სომხეთის მთავრობის მიერ გატარებული პოლიტიკა შეაქო და აღნიშნა, რომ ნიკოლ ფაშინიანის პრემიერმინისტრობის განმავლობაში გლობალურად სომხეთის მიმართ წარმოდგენები შეიცვალა.
"სხვათა შორის, მე მიმაჩნია, რომ ბოლო წლებში სომხეთში ნიკოლ ფაშინიანის მიერ შესრულებული სამუშაო ძალიან შთამბეჭდავია. მოდი, გულწრფელები ვიყოთ: რვა წლის წინ აქ არავინ ჩამოვიდოდა და ის ფაქტი, რომ დღეს თქვენს ქვეყანაში ამდენი ვიზიტი იმართება, კარგი სიგნალია," განაცხადა მაკრონმა.
საფრანგეთის პრეზიდენტის თქმით, წარსულში ბევრი ქვეყანა სომხეთს განსხვავებულად უყურებდა.
"რვა წლის წინ ამ მაგიდის გარშემო მყოფი მრავალი ქვეყანა ამ ქვეყანას რუსეთის სატელიტად მიიჩნევდა. ნიკოლ ფაშინიანმა ხავერდოვანი რევოლუცია მოაწყო და გადაწყვიტა, რომ თავისი ქვეყანა რუსეთისგან დაიცვას. ამიტომ ის იყო და არის ყოველდღიური თავდასხმების სამიზნე," დაამატა მან.
მაკრონმა ასევე ხაზი გაუსვა სომხეთის მხრიდან ევროპული არჩევანის მნიშვნელობას: "ის ფაქტი, რომ მან მსოფლიოსა და ევროპის შესახებ გადაწყვეტილება მიიღო, ძალიან ძლიერი სიგნალია."
ამასთანავე, პრეზიდენტმა მაკრონმა განაცხადა, რომ უკრაინის მხრიდან რუსეთისთვის წინააღმდეგობის გაწევა, სომხეთის სტრატეგია და მოლდოვის მიერ გადადგმული ნაბიჯები ევროპულ ქვეყნებს შორის არსებულ საერთო მიმართულებას ასახავს.
