გამოცემა Bloomberg წერს, რომ ევროკავშირის ლიდერები თვლიან, რომ წინასწარი მოთხოვნები, რომლებიც საჭიროა უკრაინის ევროკავშირში გაწევრიანების პროცესის პირველი ეტაპის დასაწყებად, დაკმაყოფილებულია.
ევროკავშირის ერთ-ერთმა მაღალჩინოსანმა Bloomberg-ს განუცხადა, რომ 23 აპრილს კვიპროსში გამართულ სამიტზე ევროკავშირის ლიდერები შეთანხმდნენ, რომ მოლაპარაკებების პირველი ეტაპი, შესაძლოა, უახლოს კვირებსა და თვეებში დაიწყოს.
თუმცა, ჯერ კიდევ არ არსებობს ზუსტი თარიღი, თუ როდის გაწევრიანდება უკრაინა.
აქამდე ზელენსკიმ განაცხადა, რომ მის ქვეყანას ეკუთვნის "სრულფასოვანი" წევრობა და უარი თქვა ევროკავშირში ალტერნატიული გზით გაწევრიანებაზე, რომელიც უფრო სწრაფია, მაგრამ ნაკლები უფლებებით.
"უკრაინას ევროკავშირში სიმბოლური წევრობა არ სჭირდება, უკრაინა იცავს საკუთარ თავს და უდავოდ, ევროპასაც," - განაცხადა ზელენსკიმ კვიპროსში ჩასვლამდე.
ევროკავშირის ქვეყნებს მანამდე შემოუთავაზებიათ არასრული წევრობის ვარიანტები. მაგალითად, გერმანიამ "ასოცირებული წევრობის" წინადადება წააყენა.
Bloomberg-ის მიერ ნანახი საბუთების მიხედვით, "ასოცირებული წევრობის" ფარგლებში უკრაინა თანდათანობით ინტეგრირდებოდა ევროკავშირის პროგრამებში და დაესწრებოდა ბლოკის შეხვედრებს, მაგრამ არ ექნებოდა ხმის მიცემის უფლება.
გამოცემა წერს, რომ მიუხედავად იმისა, რომ უკრაინის მაღალჩინოსნებმა განაცხადეს, რომ მზად არიან გადავადონ ევროკავშირის ზოგიერთ პროგრამაში, მათ შორის სოფლის მეურნეობის პოლიტიკაში, გაწევრიანება, უკრაინა იკავებს მტკიცე პოზიციას და სრულფასოვან წევრობას ითხოვს.
ზელენსკი ცდილობდა მიეღო დაპირება, რომ უკრაინა 2027 წლისთვის გაწევრიანდებოდა, როგორც რუსეთთან სამშვიდობო შეთანხმების ნაწილი.
"ჩვენ ვიცავთ ჩვენს საერთო ევროპულ ღირებულებებს, მჯერა, რომ ჩვენ ვიმსახურებთ სრულ წევრობას ევროკავშირში," - განაცხადა ზელენსკიმ
