ხორვატიის პოლიციის ცნობით, 13 ნოემბერს ქვეყნის დასავლეთ ნაწილში თურქული თვითმფრინავი ჩამოვარდა. პოლიციის თქმით, თვითმფრინავი ჩრდილოეთში მდებარე საზღვაო პორტ რიეკადან ზაგრებისკენ მიფრინავდა.
ხორვატიის შინაგან საქმეთა სამინისტროს განცხადების მიხედვით, Air Tractor AT-802 ტიპის თვითმფრინავი რადარებიდან ადგილობრივი დროით დაახლოებით 17:00 საათზე გაქრა. აქედან 20 წუთში საგანგებო სამსახურს აცნობეს, რომ ქალაქ სენიის ახლოს, ადრიატიკის ზღვის სანაპიროსთან, თვითმფრინავი იწვოდა.
ხორვატიის საზოგადოებრივ მაუწყებელ HRT-ის ინფორმაციით, თვითმფრინავი თურქეთის სატყეო ადმინისტრაციას ეკუთვნოდა. HRT-ის ცნობით, თვითმფრინავში მხოლოდ პილოტი იმყოფებოდა, რომლის ცხედარიც ცეცხლის ჩაქრობის შემდეგ იპოვეს.
