5 ოქტომბერს ოფიციალურმა პირებმა განაცხადეს, რომ ნეპალში ბოლო 36 საათში ძლიერმა წვიმებმა მეწყრები და წყალდიდობები გამოიწვია, რის გამოც გზები ჩაიხერგა, ხიდები დაზიანდა და, სულ მცირე, 40 ადამიანი დაიღუპა.
პოლიციის სპიკერის, ბინოდ გიმირის თქმით, ქვეყნის აღმოსავლეთ ნაწილში, ინდოეთის საზღვართან, ილამის რაიონში, სხვადასხვა მეწყრებს 18 ადამიანი ემსხვერპლა. მისივე თქმით, სამხრეთ ნეპალში მეხის დაცემის შედეგად სამი ადამიანი, ხოლო უდაიპურის რაიონში წყალდიდობის გამო ერთი ადამიანი დაიღუპა.
ხელისუფლებამ განაცხადა, რომ წყალდიდობების შედეგად 11 ადამიანი წყალდიდობამ წაიღო და ისინი 4 ოქტომბრიდან დაკარგულად ითვლებიან. ასევე დაამატეს, რომ რამდენიმე გზატკეცილი მეწყრების გამოა ჩაკეტილი, რის შედეგადაც ასობით მგზავრია გაჩერებული.
სუნსარის რაიონის წარმომადგენელმა, დჰარმენდრა კუმარ მიშრამ განაცხადა, რომ მდინარე კოშიში წყლის დონე ნორმალურ მაჩვენებელზე ორჯერ მეტი იყო.
მეწყრებითა და წყალდიდობებით, რომლებიც ხშირია მთიან ნეპალში მუსონების სეზონზე, ყოველწლიურად ასობით ადამიანი იღუპება.
