გამოცემა Bloomberg-ის ცნობით, მიუხედავად პრეზიდენტი ტრამპის მიერ ინდოეთისთვის 50%-იანი ტარიფების დაწესებისა, თავდაცვის სფეროში დელისა და ვაშინგტონის ურთიერთობა შეუფერხებლად გრძელდება.
"ველოდებით, რომ აშშ-ს თავდაცვის პოლიტიკის გუნდი დელიში აგვისტოს შუა რიცხვებში ჩამოვა. ყოველწლიური ერთობლივი სამხედრო სწავლების 21-ე ეტაპის ჩატარება კი ამ თვის ბოლოს ალასკაზე იგეგმება". - თქვა ინდოეთის საგარეო საქმეთა სამინისტროს სპიკერმა, რანდჰირ ჯაისვალმა.
როგორც Bloomberg აღნიშნავს, დელისა და ვაშინგტონის ურთიერთობა მას შემდეგ დაიძაბა, რაც ტრამპმა ინდოეთს რუსული ნავთობის შეძენის გამო დამატებით 25%-იანი [ჯამში 50%] ტარიფები დაუწესა. გამოცემის შეფასებით, ამ ფონზე იმის ხაზგასმა რომ ქვეყნებს შორის თავდაცვის სფეროში ურთიერთობები უცვლელია, მნიშვნელოვანია, რადგან აშშ ინდოეთს ინდო-წყნარი ოკეანის რეგიონში ჩინეთთან მიმართებით წონასწორობის შენარჩუნებისთვის განიხილავს.
აშშ-ს სახელმწიფო დეპარტამენტმა კი ქვეყნებს შორის პარტნიორობას "ისტორიული" უწოდა და ინდოეთს დამოუკიდებლობის დღე მიულოცა.
"ჩვენი ორი ქვეყანა გაერთიანებულია საერთო ხედვით – უფრო მშვიდობიანი, აყვავებული და უსაფრთხო ინდო-წყნარი ოკეანის რეგიონი". - აღნიშნა აშშ-ს სახელმწიფო მდივანმა, მარკო რუბიომ განცხადებაში.
