ისრაელის თავდაცვის მინისტრის, ისრაელ კაცის თქმით, მან არმიას უბრძანა, რომ ისრაელის ბლოკადის დარღვევის საშუალება არ მისცენ შვედი აქტივისტის, გრეტა ტუნბერგის ნავს, რომლის მისიაც ღაზის სექტორამდე ჩაღწევაა.
ნავი Madleen-ის საზღვაო მისია პროპალესტინური და ანტიისრაელური "თავისუფლების ფლოტილიის კოალიციის" მიერ არის ორგანიზებული. ხომალდზე მყოფ 12 აქტივისტს შორის ტუნბერგი, ასევე ბრაზილიელი აქტივისტი ტიეგო ავილა და ფრანგი ევროპარლამენტარი, რიმა ჰასანი არიან.
"მე IDF-ს მივუთითე, ისე იმოქმედონ, რომ Madleen-მა ღაზამდე ვერ მიაღწიოს. ანტისემიტ გრეტასა და მის მეგობრებს გარკვევით ვეუბნები: უკან უნდა გაბრუნდეთ, რადგან ღაზამდე ვერ მიაღწევთ," - განაცხადა კაცმა.
"ისრაელის სახელმწიფო არავის მისცემს საშუალებას, დაარღვიოს ღაზაზე არსებული საზღვაო ბლოკადა, რომლის უპირველესი მიზანიც შეიარაღების მიწოდების აღკვეთაა ჰამასისთვის - მკვლელი ტერორისტული ორგანიზაციისთვის, რომელსაც ჩვენი მძევლები ჰყავს და რომელიც ომის დანაშაულებს ჩადის," - დაამატა მან.
