ადვოკატი თორნიკე მიგინეიშვილი წერს, რომ შინაგან საქმეთა სამინისტრომ ადმინისტრაციული ჯარიმების საჩივრების განხილვის ვადა 1-დან 3 თვემდე გააგრძელა.
"ჯარიმებთან დაკავშირებულმა საჩივრებმა (შსს-ში) პირველი შედეგი უკვე აჩვენა. დღეს ერთმანეთის მიყოლებით გვბარდება დადგენილებები, რომელთა მიხედვითაც, შსს 1-თვიან ვადაში საჩივრის განხილვას ვერ ასწრებს და ვადას 3 თვემდე აგრძელებს. შესაბამისად, კიდევ 2 თვით გადაიდება თითოეული პროცესი და ჯარიმის გადახდის ვადაც". - წერს მიგინეიშვილი Facebook-ზე.
კიდევ ერთი მოქალაქე ამბობს, რომ აქციაზე გზის გადაკეტვისთვის მიღებული ჯარიმა მან შსს-ში გაასაჩივრა და 12 მარტს ფოსტით მიუტანეს დადგენილება, რომლითაც, მისი თქმით, ეცნობა, რომ საჩივრის განხილვის ვადა 1-დან 3 თვემდე გაგრძელდა.
ინფორმაციის გადასამოწმებლად, ტაბულა შსს-ს დაუკავშირდა და უწყებისგან პასუხს ელოდება.
