დანიის პრემიერმინისტრმა მეტე ფრედერიკსენმა აშშ-ს არჩეულ პრეზიდენტ დონალდ ტრამპს სატელეფონო საუბრის დროს განუცხადა, რომ გრენლანდიას უნდა მიეცეს საშუალება, დამოუკიდებლობის საკითხი თავისით გადაწყვიტოს.
ფრედერიკსენის სამსახურის მიერ გავრცელებულ პრესრელიზში წერია, რომ 45-წუთიანი სატელეფონო საუბრისას მან კიდევ ერთხელ გაიმეორა გრენლანდიის პრემიერმინისტრის, მუტე ეგედეს მიერ გაკეთებული განცხადება იმის შესახებ, რომ "გრენლანდია არ იყიდება".
ამასთანავე, სატელეფონო საუბრისას დანიის პრემიერმინისტრმა ხაზი გაუსვა "არქტიკის უსაფრთხოების განმტკიცების აუცილებლობასაც" და შეახსენა ტრამპს ძლიერი სავაჭრო ურთიერთობების მნიშვნელობა, როგორც ორ ქვეყანას, ასევე აშშ-ს და ევროკავშირს შორის.
ლიდერებმა ასევე ისაუბრეს უკრაინაში მიმდინარე კონფლიქტზე, ახლო აღმოსავლეთში არსებულ სიტუაციასა და ჩინეთთან ურთიერთობების საკითხზე.
უკანასკნელი რამდენიმე კვირის განმავლობაში ტრამპი ინტერესს გამოხატავდა გრენლანდიის მიმართ. 23 დეკემბერს გაკეთებულ განცხადებაში მან კვლავ დააყენა აშშ-ს მიერ დანიის სამეფოს ავტონომიური რეგიონის, გრენლანდიის, შესყიდვის საკითხი. მან ასევე არ გამორიცხა სამხედრო ძალის გამოყენების შესაძლებლობაც.
გასულ კვირაში დანიის პრემიერმინისტრმა დაადასტურა, რომ ტრამპთან კონტაქტის დამყარებას ცდილობდა. მისი თქმით, არ არსებობდა გრენლანდიაზე თავდასხმის რეალური საფუძველი. 15 იანვარს გამართული შეხვედრის შემდეგ, ფრედერიკსენმა განაცხადა, რომ საუბრის დროს "გრენლანდიის მიმართ ამერიკის განსაკუთრებით დიდი ინტერესი" დადასტურდა, თუმცა პრობლემის საბოლოო გადაწყვეტა ვერ მოხერხდა და საჭიროა დიალოგის შენარჩუნება.
აშშ-ს არჩეულმა პრეზიდენტმა გრენლანდიის შესყიდვის საკითხი თავდაპირველად პირველი ვადით პრეზიდენტობის დროს დააყენა. მან 2019 წელს დანიაში ოფიციალური სახელმწიფო ვიზიტი გააუქმა, როდესაც დანიელმა მაღალჩინოსნებმა განაცხადეს, რომ გრენლანდიის ავტონომიური ტერიტორია არ იყიდებოდა.
