საქართველოს მთავრობამ ცენტრალური საარჩევნო კომისიის ადმინისტრაციული შენობა სტრატეგიული მნიშვნელობის ობიექტებს შორის შეიტანა. შესაბამის დადგენილებას ხელი პრემიერმინისტრმა, ირაკლი კობახიძემ არჩევნებამდე 3 დღით ადრე, 23 ოქტომბერს მოაწერა.
მთავრობის დადგენილებაში წერია, რომ სტრატეგიული ან/და განსაკუთრებული მნიშვნელობის ობიექტების ნუსხა სისხლის სამართლის კოდექსის 222-ე მუხლის ან/და 330-ე მუხლის მიზნებისთვის დამტკიცდა.
222-ე მუხლი სტრატეგიული ობიექტის ხელში ჩაგდებას ან ბლოკირებას გულისხმობს და 2 წლამდე თავისუფლების აღკვეთას ითვალისწინებს. იგივე ქმედების ჯგუფურად ჩადენა კი 2-დან 4 წლამდე პატიმრობით ისჯება.
330-ე მუხლის მიხედვით კი, ტერორისტული მიზნით სტრატეგიული ობიექტის ხელში ჩაგდება ან ბლოკირება 10-დან 15 წლამდე პატიმრობას ითვალისწინებს.
ცესკოს შენობის გარდა, მთავრობის დადგენილებით, სტრატეგიული მნიშვნელობის ობიექტებს შორის ასევე მოხვდა:
- საქართველოს უმაღლესი წარმომადგენლობითი ორგანოს ან/და აღმასრულებელი ხელისუფლების ორგანოების/დაწესებულებების, აგრეთვე ავტონომიური რესპუბლიკების უმაღლესი წარმომადგენლობითი ან/და აღმასრულებელი ორგანოების ადმინისტრაციული შენობები;
- საქართველოს პრეზიდენტის ადმინისტრაციის ადმინისტრაციული შენობა;
- საქართველოს მთავრობის ადმინისტრაციის ადმინისტრაციული შენობა;
- საქართველოს საკონსტიტუციო სასამართლოსა და საერთო სასამართლოების ადმინისტრაციული შენობები;
- საქართველოს იუსტიციის უმაღლესი საბჭოს ადმინისტრაციული შენობა;
- მუნიციპალიტეტის საკრებულოს ან/და მერიის ადმინისტრაციული შენობები;
- საქართველოს პროკურატურის სისტემის ადმინისტრაციული შენობები;
- ეროვნული უსაფრთხოების საბჭოს აპარატის ადმინისტრაციული შენობა;
- საქართველოს სახელმწიფო უსაფრთხოების სამსახურის ადმინისტრაციული შენობა;
- საქართველოს დაზვერვის სამსახურის ადმინისტრაციული შენობა;
- საქართველოს ეროვნული ბანკის ადმინისტრაციული შენობა;
- საელჩოები და საკონსულო დაწესებულებები;
- საქართველოს ცენტრალური საარჩევნო კომისიის ადმინისტრაციული შენობა;
- საქართველოს საპატრიარქო;
- სასაზღვრო გამტარი პუნქტი;
- საზღვრის დაცვის ინფრასტრუქტურა და ობიექტი;
- ნავთობისა და ბუნებრივი აირის საცავის ტერმინალი;
- გაზსაცავი ობიექტი, გაზის გამანაწილებელი ობიექტი, წყალმომარაგების ცენტრალური სისტემა (ობიექტი);
- გაზშემკრები სადგური;
- ნავთობ და გაზგადამამუშავებელი ობიექტი, მისი საწარმოო სიმძლავრის მიუხედავად;
- მაღალი ძაბვის ქვესადგური (110 კვ და მეტი);
- ელექტროენერგიის გადაცემისა და განაწილების მართვის ობიექტი და სისტემა;
- იმ საწარმოების შენობა-ნაგებობები, რომლებიც იყენებენ რადიოაქტიურ ან/და ტოქსიკურ ნივთიერებებს;
- სახელმწიფო ან სამობილიზაციო რეზერვის სასაწყობო შენობა-ნაგებობა ან სათავსი;
- სტაციონარული სამედიცინო დაწესებულება, ბიოუსაფრთხოების (BSL) პირველი ან მე-2 დონის მქონე ლაბორატორიები და სამეცნიერო-კვლევითი დაწესებულებები, რომლებიც აწარმოებენ დაკვირვებებსა და კვლევებს განსაკუთრებულად საშიშ ინფექციებსა და საშიშ ინფექციურ დაავადებებზე;
- თავდაცვისა და უსაფრთხოების სექტორის სარგებლობაში არსებული შენობა-ნაგებობა;
- ელექტრონული საკომუნიკაციო ქსელების სახაზო ნაგებობა;
- შპს „საქართველოს ტელერადიოცენტრისა“ და მაუწყებლების შენობა-ნაგებობა, სამაუწყებლო და ელექტრონული კომუნიკაციების ყველა სახის ანძა;
- ნავსადგურის ტერიტორია და აკვატორია (ნავმისადგომები, ტერმინალები, ჰიდროტექნიკური ნაგებობები, შუქურები, სტაციონარული საზღვაო სანავიგაციო ნიშნები, შესასვლელი არხი);
- რკინიგზა, რკინიგზის სადგური და სხვა სარკინიგზო ინფრასტრუქტურა, სარკინიგზო მოძრავი შემადგენლობა;
- მაგისტრალური ნავთობსადენი, გაზსადენი და წყალსადენი;
- მეტროპოლიტენი;
- აეროპორტის ტერიტორია.
