შინაურ ბინადარ ცხოველთა შესახებ კანონის ამოქმედების შემდეგ დაბადებული ძაღლებისა და კატებისთვის სტერილიზაცია/კასტრაცია სავალდებულო იქნება. ამის შესახებ კანონპროექტის ერთ-ერთმა ავტორმა, დეპუტატმა მაია ბითაძემ განაცხადა.
"კანონპროექტში სიახლე შემოდის. ეს არის სტერილიზაცია/კასტრაციის ვალდებულება. ჩვენ, ყველას ვალდებულება გვექნება, კანონის კონკრეტული მუხლების ამოქმედების შემდეგ დაბადებულ ცხოველებს სტერილიზაცია/კასტრაცია გავუკეთოთ - იმ ვეტერინალური წესების მიხედვით, რომელიც მოქმედი კანონმდებლობითაც დადგენილია". - თქვა ბითაძემ პარლამენტში, სადაც კანონპროექტის განხილვა მიმდინარეობს.
ბითაძის თქმით, გამონაკლისი სანაშენე ძაღლებს შეეხება, რომლის პატრონიც შესაბამის ცნობას აიღებს. ასევე, კანონი განსხვავებული იქნება სამწყემსო და იმ ძაღლების მიმართ, რომელთაც ძალოვანი სტრუქტურები სამსახურეობრივი მიზნით იყენებენ.
კანონპროექტის მიხედვით, მეპატრონე, რომელიც ცხოველის გამრავლებით არის დაინტერესებული, ვალდებულია, შესაბამისად ავტორიზებულ საშენს მიმართოს და ვეტერინალური დაწესებულებიდან ცხოველის ჯანმრთელობის შესახებ ცნობა და კინოლოგიური/ფელინოლოგიური დაწესებულებიდან ჯიშიანობასა და გამრავლებაზე ვარგისიანობის შესახებ ცნობა წარუდგინოს.
საქართველოს პარლამენტში შინაურ ბინადარ ცხოველთა შესახებ კანონპროექტის განხილვა 4 მარტს დაიწყო. მას რეგიონული პოლიტიკისა და თვითმმართველობის, ადამიანის უფლებათა დაცვისა და სამოქალაქო ინტეგრაციის, ჯანმრთელობის დაცვისა და სოციალურ საკითხთა და საფინანსო-საბიუჯეტო კომიტეტებმა პირველი მოსმენით მხარი უკვე დაუჭირეს.
