აშშ-მ საჯარო გახადა დოკუმენტები, რომელთაგან ერთ-ერთში საუბარია, რომ რუსეთის ყოფილი პრეზიდენტი, ბორის ელცინი რუსეთის NATO-ში შესვლას ემხრობოდა.
გასაჯაროებული დოკუმენტი შეეხება ბორის ელცინის აშშ-ს ყოფილ პრეზიდენტთან, ბილ კლინტონთან შეხვედრას, რომელიც 1994 წლის 13 იანვარს, ნოვო-ოგარევოში შედგა. ანგარიში, რომელიც აშშ-ს საელჩოს რუსეთში გაგზავნილი ჰქონდა სახელმწიფო დეპარტამენტისთვის, აღწერს ვახშამზე გამართულ საუბრებს.
დოკუმენტის მიხედვით, ელცინმა კლინტონს უთხრა: "ნამდვილად გეთანხმებით NATO-ზე" და დაამატა, რომ "რუსეთი უნდა იყოს პირველი ქვეყანა, რომელიც NATO-ს უნდა შეუერთდეს". დოკუმენტის მიხედვით, ელცინი ამბობდა, რომ ამის შემდეგ უნდა გაწევრიანებულიყვნენ ცენტრალური და აღმოსავლეთ ევროპის სხვა ქვეყნები.
ამას გარდა, ანგარიშის მიხედვით, ელცინმა კლინტონს შესთავაზა შეექმნათ "გარკვეული სახის კარტელი" აშშ-ს, რუსეთისა და ევროპელების მონაწილეობით, რათა "უზრუნველეყოთ მსოფლიო უსაფრთხოების გაუმჯობესება". დოკუმენტის მიხედვით, კლინტონმა მას ფრთხილი პასუხი გასცა და ყურადღება "კარტელზე" ან რუსეთის NATO-ში გაწევრიანებაზე არ გაუკეთებიათ.
ამას გარდა, ამავე დოკუმენტში ნათქვამია, რომ ელცინი შეეხო საქართველოსა და მოლდოვასაც, თქვა, რომ სისხლის ღვრის შეწყვეტა სურდა და დაამატა: "იმპერიული მისწრაფებების ბრალდებები გვაზიანებს და არასწორია".
მსგავსი დოკუმენტები წარსულშიც გავრცელებულა. ერთ-ერთ მათგანში ელცინი კლინტონს ეუბნებოდა: "ევროპა დაგვითმეთ". დათმობის არგუმენტად რუსეთის ყოფილი პრეზიდენტი ამბობდა, რომ რუსეთი ევროპაშია და აშშ არა.
"შეგიძლია აიღო ყველა სხვა ქვეყანა და ისინი უსაფრთხოებით უზრუნველყო. მე წავიღებ ევროპას და მათ მივაწოდებ უსაფრთხოებას". – ამბობდა ელცინი 2020 წელს გავრცელებული დოკუმენტის მიხედვით.
