Edison Research-ის კვლევით, მოსახლეობის 17%-ის აზრით, ყველაზე მნიშვნელოვანი პრობლემა, რომლის წინაშეც დღეს საქართველო დგას განათლებაა. პროცენტულად ამდენივე ადამიანი გამოყოფს სხვა ორ პრობლემას, კერძოდ, პენსიებსა და ნარკოტიკების არალეგალურ გამოყენება-გავრცელებას. კვლევა ორგანიზაციამ ტელეკომპანია ფორმულას დაკვეთით ჩაატარა.
მოსახლების 15%-თვის ყველაზე მნიშვნელოვანი პრობლემა ჯანდაცვაა, ხოლო 11% ასეთად საქართველოში რუსების მიგრაციას ასახელებს.
გარდა ამისა, კითხვაზე, თუ რამდენად ეთანხმება ან არ ეთანხმება ხალხი მოსაზრებას, რომ ფასების მატება საქართველოში ხელისუფლების ბრალია, მოსახლეობის 43%-მა სრული, ხოლო 28%-მა ნაწილობრივი თანხმობა გამოთქვა. წინადადებას მოსახლეობის 12% სრულიად არ ეთანხმება.
ფორმულას ცნობით, კვლევის ფარგლებში პირისპირი გამოკითხვის მეთოდით, ქვეყნის მასშტაბით შემთხვევითი შერჩევით გამოიკითხა საქართველოში მცხოვრები 1 500 საარჩევნო უფლების მქონე 18 წლისა და მეტი ასაკის ადამიანი. გამოკითხვა 2023 წლის 1-ლი დეკემბრიდან 22 დეკემბრის პერიოდში ჩატარდა.
კვლევის შედეგების ცდომილება არის +/- 3%, 95%-იანი სანდოობის დონისთვის.
გარკვეული შეკითხვების შემთხვევაში, მათ შორის, ყველაზე მნიშვნელოვანი პრობლემის შესახებ დასმულ შეკითხვაზე, რამდენიმე პასუხის არჩევა დაიშვებოდა.