29 ოქტომბერს დაღესტნის მაჰაჩყალის საერთაშორისო აეროპორტში განვითარებულ მოვლენებს რუსეთი "გარე ჩარევას" აბრალებს.
"გუშინ აეროპორტში განვითარებული მოვლენები, მეტწილად, გარე ჩარევის შედეგია", - თქვა კრემლის პრესსპიკერმა დმიტრი პესკოვმა 30 ოქტომბერს გაკეთებულ განცხადებაში.
29 ოქტომბერს მაჰაჩყალის აეროპორტში თელ-ავივიდან ჩამოსულ რეისს ანტისემიტურად განწყობილი ბრბო დახვდა. დემონსტრანტები აეროპორტის ტერიტორიაზე შეიჭრნენ და ებრაელებს ეძებდნენ. როგორც მომსწრეები ამბობენ, ისინი ყველა შენობაში შედიოდნენ. მათ ასაფრენ ბილიკზე შეღწევაც შეძლეს და თელ-ავივიდან ჩამოფრენილ თვითმფრინავში შეღწევას ცდილობდნენ.
