პოლონეთის ეროვნული საარჩევნო კომისიის მონაცემებით, დათვლილია ბიულეტენების 99.96%. შედეგები ცხადყოფს, რომ მმართველმა პარტიამ პარლამენტში უმრავლესობა დაკარგა.
15 ოქტომბრის საპარლამენტო არჩევნებზე მოსახლეობის აქტივობა შეფასდა როგორც "უპრეცედენტოდ მაღალი". ამომრჩეველთა ხმების 35.39% მმართველმა პარტიამ - კანონმა და სამართლიანობამ მიიღო, 30.68% - დონალდ ტუსკის სამოქალაქო კოალიციამ, 14.41% - მესამე ძალამ, 8.61% - ახალმა მემარცხენეებმა, ხოლო 7.16% - კონფედერაციამ. სწორედ ამ ხუთმა პოლიტიკურმა ძალამ გადალახა საარჩევნო ბარიერი.
წინასწარი მონაცემებით, იაროსლავ კაჩინსკის კანონი და სამართლიანობა 460-ადგილიან სეიმში 196 მანდატს მიიღებს, დონალდ ტუსკის სამოქალაქო პლატფორმა 158-ს, მესამე ძალა - 61-ს, ახალი მემარცხენეები 30-ს, ხოლო კონფედერაცია - 15-ს.
გარდა ამისა, სენატში ოპოზიცია ჯამში 65 ადგილს მიიღებს, ხოლო კანონი და სამართლიანობა - 34-ს.
მთავარი ოპოზიციური პარტია სამოქალაქო პლატფორმა დიდი ალბათობით კოალიციას შექმნის მესამე გზასთან და ახალ მემარცხენეებთან. ულტრამემარჯვენე კონფედერაცია კი, მოქმედი მმართველი გუნდის თანამოაზრედ მიიჩნევა.
Ipsos-ის ეგზიტპოლის მიხედვით, 15 ოქტომბრის არჩევნებზე PiS-მა ხმათა 36.8%, ხოლო სამოქალაქო კოალიციამ (KO) 31.8% აიღო.
კანონი და სამართლიანობა იაროსლავ კაჩინსკის ლიდერობით, უკვე 8 წელია, რაც პოლონეთს მართავს. მმართველი პარტიის პოლიტიკის კრიტიკოსების თქმით, 2015 წელს ხელისუფლებაში მოსვლის შემდეგ PiS-მა პოლონეთის სასამართლო სისტემა და საზოგადოებრივი მედია საკუთარი გავლენის ქვეშ მოაქცია.
