აშშ ისრაელთან და ეგვიპტესთან აქტიურ მოლაპარაკებებს აწარმოებს, რომ შექმნას უსაფრთხო გასასვლელი, რისი საშუალებითაც ღაზის სექტორის მშვიდობიან მოსახლეობას ტერიტორიის დატოვება შეეძლება.
"ჩვენ აქტიურად ვმსჯელობთ ამ საკითხზე ჩვენს ისრაელელ და ეგვიპტელ კოლეგებთან ერთად. მხარს ვუჭერთ მშვიდობას. მშვიდობიანი მოსახლეობა ჰამასის ქმედებებში დამნაშავე არ არის. მათ არაფერი დაუშავებიათ… მშვიდობიან მოქალაქეებს უნდა მიეცეთ ბრძოლის თავიდან აცილების შესაძლებლობა. ”, - განუცხადა ჟურნალისტებს თეთრი სახლის ეროვნული უშიშროების საბჭოს სპიკერმა ჯონ კირბიმ.
თეთრი სახლის ეროვნული უშიშროების საბჭოს სტრატეგიული კომუნიკაციების კოორდინატორის, ჯონ კირბის თქმით, ჰუმანიტარული დახმარების გაგრძელება მნიშვნელოვანია. ბაიდენის ადმინისტრაცია კაიროსა და ისრაელთან მუშაობს, რათა მათ მიაღწიონ პალესტინელებთან.
ღაზის სექტორიდან ჰამასის ისრაელზე მოულოდნელი თავდასხმა 7 ოქტომბერს, ადგილობრივი დროით დილის 7 საათზე დაიწყო, როცა ისრაელის მიმართულებით ტერორისტებმა ასობით რაკეტა ისროლეს, პარალელურად კი სამხრეთით მდებარე ქალაქებში შეიჭრნენ.
თავდასხმა ერთდროულად ხმელეთიდან, ზღვიდან და ჰაერიდან განხორციელდა. ისრაელისთვის ეს სრულიად მოულოდნელი აღმოჩნდა.
თავდასხმის თარიღამდე ერთი დღით ადრე შესრულდა იომ კიპურის ომის (ეგვიპტისა და სირიის ისრაელზე თავდასხმის) 50 წლისთავი - ექსპერტების ნაწილი მიიჩნევს, რომ ეს შემთხვევითობა არ არის.
ჰამასის ტერორისტებმა დახოცეს ისრაელის ასობით მოქალაქე, მათ შორის, ქალები, ბავშვები და მოხუცები.
ტყვედ აიყვანეს ისრაელის ჯარისკაცები და სამოქალაქო პირები. ტერორისტები ტყვეებს, მათ შორის, ბავშვებს არაადამიანურად ეპყრობიან. მათი ნაწილი ღაზის სექტორში ბრბოს თვალწინ, აღლუმით ჩამოატარეს და ვიდეოები გაავრცელეს.
საპასუხოდ ისრაელმა ჰამასის წინააღმდეგ ანტიტერორისტული ოპერაცია "რკინის ხმლების" დაწყება გამოაცხადა და ტერიტორიების გათავისუფლებასთან ერთად ღაზის სექტორზე სარაკეტო იერიშების მიტანა დაიწყო.
8 ოქტომბერს ისრაელმა საომარი მდგომარეობა ოფიციალურად გამოაცხადა. პრემიერმინისტრი ნეთანიაჰუ ამბობს, რომ ჰამასი "ძლევამოსილი შურისგებისთვის" უნდა მოემზადოს. ღაზის სექტორში მცხოვრებლებს ისრაელი ტერიტორიის დატოვებისკენ მოუწოდებს.
