57 წლის ასაკში გარდაიცვალა ფოტოგრაფი, სანდრა ბულოკის დიდი ხნის პარტნიორი ბრაიან რენდალი.
სიკვდილის მიზეზი ამიოტროფული გვერდითი სკლეროზი(ALS) გახდა, რომელსაც რენდალი 3 წლის განმავლობაში ებრძოდა. ინფორმაციას გარდაცვლილის ოჯახი ავრცელებს:
"მწუხარებით გიზიარებთ, რომ ბრაიან რენდალი 5 აგვისტოს, ALS-თან 3-წლიანი ბრძოლის შემდეგ გარდაიცვალა".
ამიოტროფული გვერდითი სკლეროზი ნეიროდენერაციული დაავადებაა. ადრეულ ეტაპზე დაავადება კუნთების დასუსტებას იწვევს, პროგრესირებასთან ერთად ადამიანს უჭირს სიარული და ლაპარაკი, ბოლო სტადიაზე კი – ყლაპვა და სუნთქვა.
ბულოკმა და რენდალმა ერთმანეთი 2015 წელს ფოტოსესიაზე გაიცნეს. მათი ურთიერთობის შესახებ საჯაროდ მსახიობმა მხოლოდ 2021 წელს ილაპარაკა.
