პარტია დროა ორკ-ქოცების მიერ Pride ფესტივალის ჩაშლას გამოეხმაურა. პარტიაში აცხადებენ, რომ ეს მოძალადე ჯგუფები, რომლებმაც ფესტივალი ჩაშალეს და ტერიტორია დაარბიეს, ქართული ოცნების მიერაა დაფინანსებული და ორგანიზებული.
"პარტია დროა ყველა ლგბტქი+ ადამიანსა და თბილისი პრაიდის გუნდს სრულ მხარდაჭერას უცხადებს. ყველა შესაძლო სახით, თუნდაც ფიზიკურად, დავიცავთ შეკრებისა და გამოხატვის თქვენს კონსტიტუციურ უფლებას. რა თქმა უნდა, ფესტივალის ორგანიზატორების ინსტრუქციების მიხედვით ვიმოქმედებთ. როგორც მოსალოდნელი იყო, საქართველოს ხელისუფლებამ მორიგ ჯერზე არ შეასრულა საკუთარი კონსტიტუციური ვალდებულება და უარი თქვა მოძალადე ჯგუფებისგან საქართველოს მოქალაქეების დაცვაზე. ეს პირველად არ ხდება და არც გასაკვირია, რადგან ეს მოძალადე ჯგუფები სწორედ ქართული ოცნების ხელისუფლების მიერაა დაფინანსებული, ორგანიზებული და დაუსჯელობით წახალისებული. საქართველოს რუსულმა ხელისუფლებამ კიდევ ერთხელ მოაწყო ძალადობის დემონსტრირება. ხელწერა იგივეა - ჟურნალისტებსა და განსხვავებულ, მათთვის მიუღებელ საზოგადოების ნაწილზე თავდასხმა. ჩვენ ბევრჯერ გვინახავს ოპოზიციურად განწყობილ აქტივისტებზე შეტევა, დარბევა და დაკავებები. ვნახეთ, როგორ იცავდა ქართული პოლიცია ლავროვის ოჯახის ქორწილსა და ქეიფს პროტესტის მონაწილეებზე სასტიკი ფიზიკური შეტევით. სწორედ ამიტომ, საქართველოს თითოეულმა მოქალაქემ უნდა იცოდეს, რომ ვცხოვრობთ ქვეყანაში, რომელშიც ხელისუფლება არის ძალადობისა და დაპირისპირების პირველი და ყველაზე დიდი წყარო". - წერია პარტიის მიერ გავრცელებულ განცხადებაში.
Tbilisi Pride Fest 2023 დღეს, 17:00-ზე იყო დაგეგმილი. თუმცა, რამდენიმე საათით ადრე ორკ-ქოცები შეიკრიბნენ და ფესტივალისკენ დაიძრნენ. ამის შემდეგ, Tbilisi Pride-მა ინფორმაცია გაავრცელა, რომ მათ ევაკუაცია მოუწიათ. რადგან სამართალდამცველებმა "ვერ შეძლეს ტერიტორიის დაცვა".
- ქოც-ორკებმა დაიკავეს ტერიტორია, დაარბიეს სცენა, ინვენტარის ნაწილი დაწვეს – IPN
- "პოლიცია სადღაც შუა გზაზე გვტოვებდა" – Tbilisi Pride-ის წევრი
შს მინისტრის მოადგილის, ალექსანდრე დარახველიძის მტკიცებით, "დღეს მობილიზებული იყო მაქსიმალური რაოდენობა პოლიციის, რაც შეიძლებოდა, ყოფილიყო ამ ლოკაციაზე დაცვისთვის". მისი თქმით, "ყველა აქცია შეუძლებელია, რომ 100%-იანი უსაფრთხოება იყოს უზრუნველყოფილი და მთლიანად იყოს დაცული, განსაკუთრებით ისეთ დროს, როცა გაშლილ ტერიტორიაზეა საუბარი, ამ რისკების თაობაზე მუდმივად ვსაუბრობდით, მოვიდა ძალიან დიდი რაოდნეობა კონტრაქციის მონაწილეებისა, ყველაფერი გავაკეთეთ, რომ ყოფილიყო თითოეული ადამიანის სიცოცხლე და ჯანმრთელობა დაცული" - თქვა მინისტრის მოადგილემ.
ალექსანდრე დარახველიძის მტკიცებით, Lisi Wonderland-ის ტერიტორიაზე დილიდან მობილიზებული იყო განსაკუთრებულ დავალებათა დეპარტამენტი, ქალაქ თბილისის პოლიცია, საპატრულო პოლიცია და "ყველა ის დანაყოფი, ვისაც ჰქონდა უფლებამოსილება, განეხორციელებინა თავისი მანდატი".
"თუმცა, თქვენ კარგად ნახეთ, რომ მოვიდა საკმაოდ დიდი რაოდენობა კონტრაქციის მონაწილეების, ჩვენ გვქონდა კორდონები გაკეთებული გზებზე, მაგრამ ეს იყო გაშლილი ტერიტორია, კონტრაქციის მონაწილეებმა მოახერხეს, შემოვლითი გზებით შემოეღწიათ და გაერღვიათ კორდონები პოლიციის, თუმცა, ჩვენ მოვახერხეთ, რომ პრაიდის ღონისძიების ორგანოზატორები და მონაწილეები, ვინც ადგილზე იყვნენ, ისინი უსაფრთხოდ გავიყვანეთ ტერიტორიიდან, არავითარი დაზიანება არ მიუღიათ, ამჟამად პოლიცია ახორციელებს შესაბამის ღონისძიებებს, იმისთვის, რომ მოხდეს სიტუაციის სტაბილიზება და არ მოხდეს რაიმე ტიპის თავდასხმები კონკრეტულ პირებზე" - თქვა მინისტრის მოადგილემ.
