ენმ

ჩერგოლეიშვილი: მელიას ჩანაწერი 2016 წლისაა და ჩვენი მეგობრული ჩეთიდანაა გავრცელებული

თამარ ჩერგოლეიშვილი

ტაბულასა და ამომრჩეველთა განათლების საზოგადოების [VES] დამფუძნებელი, თამარ ჩერგოლეიშვილი წერს, რომ ენმ-ს ყოფილი თავმჯდომარის, ნიკა მელიას ჩანაწერი, რომელიც პარტიის თავმჯდომარის არჩევნებამდე გამოქვეყნდა 2016 წლისაა და გავრცელებულია "მეგობრული ჩეთიდან", რომელშიც თავადაც იყო. 

ჩერგოლეიშვილის სიტყვებით, ჩეთში ის, გიგი უგულავა, დავით კეზერაშვილი, გივი თარგამაძე, გოკა გაბაშვილი, ლევან თარხნიშვილი, ნიკა მელია და ნიკა გვარამია იყვნენ. როგორც ის წერს, ნიკა მელია ექსპრეზიდენტთან, მიხეილ სააკაშვილთან საუბრის შესახებ მათ ხმოვან შეტყობინებებს უგზავნიდა. 

სანამ არჩევნები მორჩებოდა, არ მინდოდა ჩარევა, ან რომელიმე მხარის სასარგებლოდ მოქმედება - ხომ ვთქვი, მინდოდა, ყველას წაეგო და ასეც მოხდა იდეაში. ახლა, როცა მორჩა, გეტყვით, რომ მელიას ჩანაწერი 2016 წლისაა და ჩვენი მეგობრული ჩეთიდანაა გავრცელებული.

ამ ჩეთში ვიყავით მე, გიგა, უგულავა (ციხიდან გამოსვლის მერე და არა ვოისების მომენტში), კეზერაშვილი, გივი თარგამაძე, გოკა გაბაშვილი, ლევან თარხნიშვილი, მელია და გვარამია (რომელიც მაგ ვოისების ჩაყრის მომენტში უკვე გასული იყო, უკვე კონფლიქტი გვქონდა მიშას დოზებზე ეთერში - ვერ ვაგებინებდით, რომ დამღუპველია).

მელია ბოლო მომენტამდე მესიანიზმის მოწინააღმდეგეთა, ანუ ჩვენს ბანაკში იყო და ვოისებად ჩაგვიყარა ჩეთში მიშასთან ლაპარაკის შინაარსი (რაც მოისმინეთ). რომ გადახტა და მიშას მოღალატეები ხართო, კივილი დაიწყო - ვიცინოდით მერე ამ ვოისებზე.

მაშინაც იყო აზრი, რომ გამოქვეყნებულიყო, ოღონდ არა ფარულად, არამედ ღიად - როდის იყავი მართალი? როცა მიშას აგინებდი, თუ როცა ჩვენ მოღალატეებს გვიძახი? - ამ კითხვით. მაგრამ გიგა კატეგორიულ უარზე წავიდა და არ დაუშვა - პირადის გამოქვეყნებას სადაც მე ვარ, არ ვიკადრებთო. ფარულად გამოქვეყნებას ვერც გაუბედავდნენ (უნდოდათ).

ხოდა, ახლა გათავისუფლდნენ გიგას მორალური მარწუხებისგან და ყველაფერი იკადრეს. ანუ კეზერაშვილის, უგულავას, თარგამაძის, მაჩვის და მათი გაბაზრებულია და როგორც ნდობით აღჭურვილ პირებს, ისე ჩაუგდო.

ამის მერე ამ ადამიანებმა მელია ლიდერად ამოარჩიეს და 2021 წლის არჩევნებში მის შტაბში ბზრიალებდნენ - გამორჩენის მიზნით. როცა აღარ დააკმაყოფილა ფულის ტომარა მელიამ სათამაშოდ, ადგნენ და პირადი ვოისები გამოუქვეყნეს.

ასეთი სამარცხვინოები არიან. უარესები იქნებიან, ძალაუფლებას თუ მიაკარე - ღირსებისგან დაცლილები არიან, ამდენმა მარცხმა სულ გამოათაყვანა მორალურად.

მოკლედ, მარცხის დროს უნდა გაიცნო ადამიანები - მანდ ყველაზე კარგად ავლენენ თავებს. 

2023 წლის 9 იანვარს სოციალურ ქსელში გავრცელა ჩანაწერი, რომელშიც, სავარაუდოდ, ნიკა მელიას ხმა ისმის. ნიკა მელია ამბობდა, რომ ჩანაწერის შინაარსში არ შევიდოდა, თუმცა, დარწმუნებული იყო, რომ მისი გავრცელება შინაგან საქმეთა ყოფილი მინისტრის, ვანო მერაბიშვილის დაგეგმილია. მელიას ინფორმაციით, ადამიანები, რომელებიც მას უპირისპირდებოდნენ, ჩანაწერს რეგიონებსა და თბილისში თავიანთი ტელეფონებით დაატარებდნენ. 

კომენტარები