კობახიძე: ბოლო 2 წელია, ზურაბიშვილის დამოკიდებულება შეცვლილია, მათ შორის, ენმ-ს მიმართ

ზოგადად, ბოლო 2 წლის განმავლობაში, სალომე ზურაბიშვილი ისე მოქმედებს, როგორც არ მოქმედებდა მანამდე, 4 წლის განმავლობაში. მისი დამოკიდებულება პროცესების მიმართ აბსოლუტურად შეცვლილია. მათ შორის, მისი დამოკიდებულება შეცვლილია ნაციონალური მოძრაობის მიმართ. თქვენ გახსოვთ მისი პერსონალური, ემოციური, ნეგატიური დამოკიდებულება ენმ-ს მიმართ. 4 წლის თავზე რაღაც მოხდა, რამაც მას ეს განწყობა შეაცვლევინა. დღეს ის ამ ადამიანებს ჩვეულებრივად ხვდება და მათ ისეთი შეურაცხმყოფელი სიტყვებით არ მიმართავს, როგორც გუშინ, შვილმკვდარ დედებს, მამებსა და იმ ოჯახებს მიმართა, რომელთაც სააკაშვილის რეჟიმის მხრიდან, უშუალოდ, უმძიმესი ფორმით მიადგათ ზიანი. ის ენმ-ს წარმომადგენლებს არ ეუბნება, რატომ მომივარდითო - პირიქით, მათ პრეზიდენტის რეზიდენციაში აქეთ ეპატიჟება. როცა შენი საპრეზიდენტო საქმიანობის 4 წლის თავზე საკუთარ სტრატეგიას რადიკალურად ცვლი, ამის უკან რაღაც იმაზე მეტი უნდა იყოს, ვიდრე უბრალოდ გარედან პოლიტიკური გავლენაა. ეს არის მსჯელობა, რომელიც გარკვეულ ინფორმაციას ეფუძნება, მაგრამ, ბუნებრივია, მე ამის იქით არ შევალ. დაველოდოთ მოვლენების განვითარებას.