რუსეთის საგარეო საქმეთა სამინისტრო რამდენიმე ქვეყნის ჰაკერულ ჯგუფებს, მათ შორის ქართულს, კიბერთავდასხმებში ადანაშაულებს.
რუსეთის საგარეო უწყების ბრალდებით, მათ წინააღმდეგ გააქტიურებულია 22 ჰაკერული ჯგუფი აშშ-დან, უკრაინიდან, პოლონეთიდან და საქართველოდან.
"რუსეთის წინააღმდეგ უკანონო ოპერაციებში ჩართულია 22 ჰაკერული ჯგუფი, ყველაზე აქტიურებია IT-army of Ukraine (უკრაინა), GhostClan (აშშ), GNG (საქართველო), Squad303 (პოლონეთი)". – ამბობს რუსეთის საგარეო საქმეთა სამინისტროს საერთაშორისო ინფორმაციული უსაფრთხოების განყოფილების დირექტორი, ანდრეი კრუტსკიხი.
კრუტსკიხის თქმით, რუსეთის წინააღმდეგ მაისში მოწყობილ კიბერთავდასხმებში მონაწილეობდა 65 000-ზე მეტი ჰაკერი.
"2022 წლის მაისი მდგომარეობით, ჩვენი ქვეყნისთვის კრიტიკული ინფორმაციული ინფრასტრუქტურის ობიექტებზე, მათ შორის Rutube-ის ვიდეოჰოსთინგზე კოორდინირებულ DDoS თავდასხმებში მონაწილეობდა 65 ათასზე მეტი ჰაკერი აშშ-დან, თურქეთიდან, საქართველოდან, ევროკავშირის ქვეყნებიდან. თავდასხმების ქვეშ იყო სახელმწიფო დაწესებულებები, კრიტიკული და სოციალური ინფრასტრუქტურის ობიექტები, ჩვენი მოქალაქეებისა და რუსეთში მცხოვრები უცხოელების პირადი მონაცემების საცავები". – აღნიშნა კრუტსკიხმა.
უკრაინაში რუსეთის შეჭრის შემდეგ, რუსეთზე კიბერთავდასხმების შემთხვევები გაიზარდა.
ჰაკერული თავდასხმები თავად რუსეთის ჰიბრიდული ომის ერთ-ერთი მთავარი კომპონენტია.
