78 წლის ასაკში ქართველი თეატრის რეჟისორი თემურ ჩხეიძე გარდაიცვალა. ინფორმაციას სოციალურ ქსელში კომპოზიტორი ნიკოლოზ რაჭველი ავრცელებს.
"კიდევ ერთმა დიდმა ქართველმა გადაინაცვლა სამყაროდან სამყაროში". – წერს რაჭველი.
თემურ ჩხეიძემ 1965 წელს დაამთავრა შოთა რუსთაველის სახელობის თეატრალური ინსტიტუტის სარეჟისორო ფაკულტეტი. 1965-1967 წლებში მუშაობდა შალვა დადიანის სახელობის ზუგდიდის დრამატულ თეატრში. 1970-1980 წლებში იყო რუსთაველის თეატრის რეჟისორი, ხოლო 1980-1990 წლებში კოტე მარჯანიშვილის სახელობის თეატრის სამხატვრო ხელმძღვანელი. 1991 წლიდან არის სანქტ-პეტერბურგის დიდი თეატრის რეჟისორი, 2004 წლიდან – მთავარი რეჟისორი, 2007 წლიდან – სამხატვრო ხელმძღვანელი.
ხანგრძლივი კარიერის განმავლობაში დადგმული აქვს სამოცდაათზე მეტი სპექტაკლი. შესრულებული აქვს მთავარი როლი ფილმში მშობლიურო ჩემო მიწავ(რაიკომის მდივანი). არის საქართველოსა და რუსეთის სახალხო არტისტი.
