მიხეილ სააკაშვილი

პენიტენციური სამსახური: მიხეილ სააკაშვილი №12 პენიტენციურ დაწესებულებაშია

პენიტენციური სამსახურის ინფორმაციით, ექსპრეზიდენტი, მიხეილ სააკაშვილი №12 [რუსთავის] პენიტენციურ დაწესებულებაშია გადაყვანილი.

უწყებაში განმარტავენ, რომ მაღალი საზოგადოებრივი ინტერესიდან გამომდინარე 30 დეკემბერს მიხეილ სააკაშვილი "კანონმდებლობის მოთხოვნათა სრული დაცვით" გიორგი სამხედრო ჰოსპიტლიდან №12 პენიტენციურ დაწესებულებაში გადაიყვანეს.

თავდაპირველად, ექსპრეზიდენტის გადაყვანის შესახებ ინფორმაცია, გვიან ღამით, მისმა ერთ-ერთმა ადვოკატმა, ნიკა გვარამიამ გაავრცელა.

27 დეკემბერს მიხეილ სააკაშვილმა დაწერა, რომ მის პალატაში 6 ადამიანი შევიდა და უთხრეს, რომ გადაჰყავდათ. სააკაშვილის ცნობით, მას შემდეგ, რაც არ დაემორჩილა, მისი გადაყვანა ძალის გამოყენებით სცადეს, რა დროსაც შეუძლოდ გახდა.

პენიტენციური სამსახურის ინფორმაციით, ექიმებმა სააკაშვილის გორის ჰოსპიტლიდან გაწერის შესახებ მიიღეს გადაწყვეტილება, თუმცა ის თანამშრომლებს არ დაემორჩილა, რის გამოც მისი გადაყვანა დროებით გადავადდა.

28 დეკემბერს იუსტიციის მინისტრმა, რატი ბრეგაძემ თქვა, რომ სამინისტროს ვალდებულებაა, სამედიცინო დაწესებულების მიერ გაწერილი პატიმარი პენიტენციურ დაწესებულებაში დააბრუნოს, თუმცა ბრეგაძეს არ დაუკონკრეტებია, თუ როდის იგეგმებოდა მიხეილ სააკაშვილის გადაყვანა.

ენმ-ს წევრის, ეკა ხერხეულიძის თქმით, რომელმაც მიხეილ სააკაშვილი 29 დეკემბერს მოინახულა, მისი ჯანმრთელობის მდგომარეობა მძიმეა.

მიხეილ სააკაშვილი საქართველოში 1 ოქტომბერს დააკავეს და რუსთავის N12 პენიტენციურ დაწესებულებაში მოათავსეს. ექსპრეზიდენტი პროტესტის ნიშნად დაკავების დღიდან შიმშილობდა. 8 ნოემბერს, შიმშილობის 39-ე დღეს სააკაშვილი რუსთავის N12 პენიტენციური დაწესებულებიდან გლდანის N18 მსჯავრდებულთა საავადმყოფოში გადაიყვანეს. კლინიკაში მისი გადაყვანის შესახებ არც მისი ადვოკატები და არც ოჯახის წევრები ინფორმირებულები არ ყოფილან. მოგვიანებით გავრცელდა კადრები, რომლებშიც ჩანს, რომ სააკაშვილი გლდანის ციხეში ძალის გამოყენებით შეჰყავთ. 20 ნოემბერს, შიმშილობის 50-ე დღეს მიხეილ სააკაშვილი გორის სამხედრო კლინიკაში გადაიყვანეს, რის შემდეგაც მან შიმშილობა შეწყვიტა. იგი მკურნალობას კვლავ გორის ჰოსპიტალში აგრძელებს.

კომენტარები