დიდი ბრიტანეთის საელჩო საქართველოში ადგილობრივი თვითმმართველობის არჩევნებთან დაკავშირებით განცხადებას ავრცელებს. საელჩო იზიარებს ეუთო/ოდირის სადამკვირვებლო მისიის შეფასებებს.
"დიდი ბრიტანეთი მხარს უჭერს ეუთო/ოდირის შეფასებას, რომ საქართველოში არჩევნები კარგად იყო ადმინისტრირებული და ჩატარდა კონკურენტუნარიან გარემოში, თუმცა დარღვევების შესახებ ბრალდებებმა პროცესი დააზიანა. ეს ხარვეზები უნდა აღმოიფხვრას. იმედი გვაქვს, ყველა პოლიტიკური პარტია ჩაერთვება მეორე ტურებში" – წერს საელჩო Twitter-ზე.
- ODIHR: შეშფოთების საფუძველია პარტიის მხარდამჭერი დამკვირვებლების ყოფნა, მათი პროცესში ჩარევა
- OSCE: დაშინების ცნობები შეშფოთების საფუძველს ქმნის "დასჯის შიშის გარეშე" ხმის მიცემაზე
- OSCE: კამპანიების დაფინანსების არასაკმარისი კონტროლი, თანამდებობრივი რესურსი წაადგა ოცნებას
2 ოქტომბერს, საქართველოში ადგილობრივი თვითმმართველობის არჩევნები გაიმართა. ამ დროისთვის ცენტრალურ საარჩევნო კომისიას დათვლილი აქვს ხმების 99.97%, რის მიხედვითაც პროპორციულ ნაწილში პარტიული რეიტინგები შემდეგნაირად არის გადანაწილებული:
- ქართული ოცნება - 46.68%
- ერთიანი ნაციონალური მოძრაობა - 30.7%
- გახარია- საქართველისთვის - 7.8%
- ლელო - 2.71%
- ევროპული საქართველო - 1.66%
- გირჩი-მეტი თავისუფლება - 1.44%
რაც შეეხება თბილისს, დედაქალაქში ხმების 100% დათვლილია. ცენტრალური საარჩევნო კომისიის ოფიციალური მონაცემებით, მმართველ გუნდს, ქართულ ოცნებას 40.3% აქვს, ერთიან ნაციონალურ მოძრაობას 27.97%, გიორგი გახარიას პარტიას საქართველოსთვის კი – 8.85%.
არჩევნების შესახებ ყველა სიახლეს თვალი ადევნეთ ტაბულას საარჩევნო პორტალზე – არჩევნები 2021
