Covid-19-ის პირველმა დასალევმა ანტივირუსულმა მედიკამენტმა, მოლნუპირავირმა მთავარი კვლევები წარმატებული შედეგით გაიარა. ამის შესახებ მისი მწარმოებელი, Merck & Co. და მისი პარტნიორი Ridgeback Biotherapeutics იტყობინებიან.
მედიკამენტების კომპანიების თქმით, პრეპარატმა წარმატებით შეძლო Covid-19-ის რისკჯგუფების პაციენტებისთვის, კვლევის დროს, ვირუსის გართულება თავიდან აერიდებინა. კოვიდსაწინააღმდეგო ტაბლეტებმა საკვლევ ჯგუფში, ჰოსპიტალიზაციისა და სიკვდილიანობის რისკები მარტივი ან საშუალო მდგომარების ინფიცირებულ პაციენტებში 50%-ით შეამცირა.
მედიკამენტის ტესტირება იმდენად წარმატებით მიდიოდა, რომ მათ, აშშ-ს საკვებისა და მედიკამენტების ადმინისტრაციასთან (FDA) განხილვის შემდეგ, ექსპერიმენტში მონაწილეთა აყვანა შეწყვიტეს.
მოლნუპირავირს აღიარებას, სავარაუდოდ, წლის ბოლოს მისცემენ. მისი გამოყენება სახლის პირობებში იქნება შესაძლებელი და მისი მეშვეობით ჰოსპიტალიზირებული პაციენტების რიცხვი შემცირდება, თუ სამკურნალოდ დაამტკიცებენ და გაყიდვაში გაუშვებენ.
კომპანია Merck-ის აღმასრულებელი დირექტორის, რობ დევისის თქმით, ისინი FDA-ს ავტორიზაციას მომდევნო კვირებში მოსთხოვენ.
თუკი წამალი ავტორიზაციას მიიღებს, ის იქნება პირველი დასალევი ანტივირუსული ტაბლეტი.
მოლნუპირავირი არის მედიკამენტი, რომელიც ვირუსის რნმ-ს დააზიანებს და მის რეპლიკაციას ხელს შეუშლის.
კორონავირუსთან საბრძოლველად ამჟამად გამოყენებული მედიკამენტები, რომელთაგან ზოგი დიდ ბრიტანეთში სამკურნალოდაც დაამტკიცეს, განსხვავებულად მოქმედებენ. ისინი მონოკლონური ანტისხეულებით მზადდება. მონოკლონური ანტისხეულები არის ლაბორატორიაში დამზადებული პროტეინები, რომლებიც იმუნურ სისტემას ბაძავენ და ორგანიზმში არსებულ ანტიგენებს ებრძვიან. ამისგან განსხვავებით, ზემოხსენებული კომპანიების მედიკამენტების მიზანი უშუალოდ ვირუსთან გამკლავება და მისი ორგანიზმში გამრავლების შეჩერებაა.
