COVID-19-ის სამკურნალო, აბის ტიპის მედიკამენტი, შესაძლოა, 2021 წლის ბოლოსთვის გახდეს საზოგადოებისთვის ხელმისაწვდომი. ამის შესახებ კომპანიის CEO-მ ალბერტ ბურლამ CNBC-სთან ინტერვიუში ისაუბრა. ბურლა აღნიშნავს, რომ მოსალოდნელია, წამალი ვირუსის სხვადასხვა ვარიანტის წინააღმდეგაც ეფექტიანი იყოს. მედიკამენტი გამიზნულია ავადმყოფობის ადრეულ ეტაპზე, პირველი სიმპტომების გამოჩენისთანავე სამკურნალოდ
ალბერტ ბურლას თანახმად, კომპანია ორ ანტივირუსულ მედიკამენტზე მუშაობს, ერთის შეყვანა ორგანიზმში ინტრავენურად ხდება, მეორისა კი - ორალურად. ბურლა აღნიშნავს, რომ კომპანია მეორე პრეპარატზე, აბებზეა კონცენტრირებული, რადგან ამ ტიპის მედიკამენტს რამდენიმე უპირატესობა აქვს. მათ შორის ის, რომ წამლის დალევა სახლის პირობებში შეიძლება და საავადმყოფოში ვიზიტი საჭირო არ არის.
ინტერვიუს დროს ალბერტ ბურლამ აღნიშნა, რომ "თუ ყველაფერი კარგად ჩაივლიდა", იმედი აქვს, მედიკამენტი წლის ბოლომდე დაასრულებს ტესტირების მესამე ფაზის გავლას და ხელმისწავდომი გახდება.
Pfizer-მა Covid-19-ის წამლის კლინიკური გამოცდა მარტში დაიწყო. მარტში Pfizer-ის მთავარი მეცნიერმუშაკი მიკაელ დოლსტენი ამბობდა, რომ იმის გათვალისწინებით, როგორ აგრძელებს კორონავირუსი მუტაციას და როგორი გლობალური გავლენა აქვს Covid-19-ს, სამკურნალო საშუალებების ქონას კრიტიკული მნიშვნელობა ექნება.
Pfizer-ის შემუშავებული მედიკამენტი უკავშირდება ვირუსის ცილას, პროტეაზას, რაც ვირუსის რეპლიკაციას, გამრავლებას, აჩერებს. მსგავსი პრინციპით მოქმედ, პროტეაზას ინჰიბიტორ (დამბლოკველ) მედიკამენტებს წარმატებით იყენებენ სხვა ვირუსული დაავადებების, მათ შორის აივ-ისა და ჰეპატიტი-C-ს სამკურნალოდ.
კორონავირუსით ინფიცირებულებისთვის დაავადების საწყის ეტაპზე მკურნალობის საშუალებების დიდი არჩევანი არ არის. მაგალითად, ანტისხეულების თერაპია, რომელიც აშშ-შია ავტორიზებული, გვერდითი ეფექტების განვითარების მაღალ რისკებთანაა დაკავშირებული. გარდა ამისა, მკურნალობა პაციენტებმა საავადმყოფოში ექიმის ზედამხედველობის ქვეშ უნდა მიიღონ. იქიდან გამომდინარე, რომ Pfizer-ის ახალი მედიკამენტი აბია, დამტკიცების შემთხვევაში, მისი გამოყენება უფრო მარტივი იქნება.
თუ ახალი მედიკამენტის პირველი ფაზის გამოცდა წარმატებული იქნება, კომპანია გეგმავს, მეორე და მესამე ფაზა გაერთიანებულად წლის მეორე კვარტალში დაიწყოს. მიკაელ დოლსტენის მარტში ვარაუდობდა, ამ ტემპით აშშ-ს მარეგულირებელი სააგენტოსთვის, საკვებისა და მედიკამენტების ადმინისტრაციისთვის პრეპარატის დამტკიცებისთვის მიმართვა წლის ბოლოს უკვე შესაძლებელი იქნება.
წამლის ეფექტიანობის გამოცდის საწყის ეტაპზე კვლევა ფოკუსირდება ახლად ინფიცირებულ ადამიანებზე. Pfizer-ი ასევე გეგმავს გამოიკვლიოს, შეძლებს თუ არა მედიკამენტი, ინფექციისგან დაიცვას ის ადამიანები, რომლებსაც ინფიცირებულებთან კონტაქტი აქვთ, მათთან ერთად ცხოვრება უწევთ.
