პენიტენციური სამსახურის ინფორმაციით, სისტემაში კოვიდინფიცირებული 105 პატიმარია, რაც მათი საერთო რაოდენობის მხოლოდ ერთ პროცენტს წარმოადგენს. მათივე ცნობით, შემთხვევათა უმეტესობა მიმღებ დაწესებულებებში ახლადდაკავებულ პირებში გამოვლინდა და ყველა ინფიცირებულის ჯანმრთელობის მდგომარეობა დამაკმაყოფილებელია.
"პროტოკოლის მიხედვით, მიმღებ ციხეებში ახლდადაკავებულები სპეციალურად მოწყობილ საკარანტინე სივრცეებში თავსდებიან. მედიკოსების მეთვალყურეობის ქვეშ ისინი შესაბამის პროცედურებს 8-12 დღის განმავლობაში გადიან. მათი განთავსება პენიტენციურ დაწესებულებაში მხოლოდ კოვიდ ტესტზე უარყოფითი პასუხის შემთხვევაში ხდება. ამჟამად, 105 კოვიდ ინფიცირებულიდან 66 თბილისის ერთ-ერთ სამოქალაქო კლინიკაშია მოთავსებული, თუმცა მათგან 52 კოვიდინფიცირებული ამ ეტაპზე სამედიცინო დახმარებას არ საჭიროებს და დაკვირვების მიზნით ამავე კლინიკის ე.წ. სასტუმრო ნაწილში იმყოფება. 39 კოვიდ ინფიცირებული ხონის საავადმყოფოსთან არსებულ საკარანტინე სივრცეშია მოთავსებული. ყველა ინფიცირებულის ჯანმრთელობის მდგომარეობა დამაკმაყოფილებელია. ისინი მედპერსონალის დაკვირვების ქვეშ იმყოფებიან და საჭიროებისამებრ შესაბამისი დახმარება გაეწევათ.
პენიტენციურმა სამსახურმა კორონავირუსის გავრცელების პრევენციის მიზნით, დაავადებათა კონტროლისა და საზოგადოებრივი ჯანმრთელობის ეროვნული ცენტრისა (NCDC) და ჯანდაცვის სამინისტროს ხელშეწყობით მსჯავრდებულთა ნებაყოფლობითი იმუნიზაციის პროცესი 18 მაისს დაიწყო და ყველა სასჯელაღსრულების დაწესებულებაში არსებული პროტოკოლის დაცვით ამ დრომდე მიმდინარეობს. ამ ეტაპზე პენიტენციურ სისტემაში მსჯავრდებულების 70%- მდე უკვე ვაქცინირებულია". – აღნიშნულია განცხადებაში.
ნაციონალური მოძრაობა, ეპიდვითარების გამო, ფართო ამნისტიის ინიციატივით გამოდის. პარტიის წევრის, სოფო ჯაფარიძის თქმით, მსუბუქი და ნაკლებად მძიმე დანაშაულებისთვის მსჯავრდადებული პირები დაუყოვნებლივ უნდა გათავისუფლდნენ.
