სპეციალური პენიტენციური სამსახურის ინფორმაციით, ირაკლი ნადირაძე, ირაკლი ქერაშვილი და გურამ მირცხულავა სარგებლობენ სატელეფონო საუბრის უფლებით, კანონმდებლობით დადგენილი წესის შესაბამისად და მათთვის არ დაუწესებიათ 10 დღეში ერთხელ სატელეფონო უფლებით სარგებლობის შეზღუდვა.
"სპეციალური პენიტენციური სამსახური ეხმაურება ტელეკომპანია პირველისა და ტაბულას მიერ გავრცელებულ ცრუ ინფორმაციას ბრალდებულებისთვის/მსჯავრდებულებისთვის (ირაკლი ნადირაძე, ირაკლი ქერაშვილი და გურამ მირცხულავა) სატელეფონო ზარების შეზღუდვასთან დაკავშირებით.
ბრალდებულს პატიმრობის აღსრულებისას, აგრეთვე მსჯავრდებულს თავისუფლების აღკვეთის აღსრულებისას გარანტირებული აქვს საქართველოს კონსტიტუციით, საქართველოს საერთაშორისო ხელშეკრულებებით, პენიტენციური კოდექსითა და საქართველოს სხვა საკანონმდებლო და კანონქვემდებარე ნორმატიული აქტებით აღიარებული უფლებები და თავისუფლებები. მათ შორის, სატელეფონო საუბრითა და მიმოწერით სარგებლობის უფლება.
გავრცელებულ განცხადებებში მითითებული ყველა პირი შეუზღუდავად სარგებლობს სატელეფონო საუბრის უფლებით, კანონმდებლობით დადგენილი წესის შესაბამისად, ათ დღეში ერთხელ სატელეფონო უფლებით სარგებლობის შეზღუდვასთან დაკავშირებული ცრუ და გადაუმოწმებელი ინფორმაციის გავრცელება მიზნად ისახავს საზოგადოების სიცრუეში შეყვანას და სპეციალური პენიტენციური სამსახურის საქმიანობის დისკრედიტაციას.
აქვე აღსანიშნავია, რომ სატელეფონო საუბარი ხორციელდება ბრალდებულის/მსჯავრდებულის ხარჯითა და სატელეფონო საუბრის განსახორციელებლად ბრალდებულს/მსჯავრდებულს ბალანსზე უნდა ჰქონდეს შესაბამისი ოდენობის თანხა." - ნათქვამია პენიტენციური სამსახურის განცხადებაში.
ცნობისთვის, დღეს, ტელეკომპანია ფორმულას ეთერში რეჟიმის პატიმრის, ირაკლი ქერაშვილის დამ, ქეთუნა ქერაშვილმა თქვა, რომ ირაკლი ქერაშვილს, გურამ მირცხულავას და თორნიკე გოშაძეს შეუზღუდეს ტელეფონის გამოყენება. ლევან ბეჟაშვილმა განაცხადა, რომ იგივე შეზღუდვა დაუწესეს კიდევ ერთ პატიმარს, რეზო კიკნაძეს. ინფორმაციის გამოქვეყნებამდე ტაბულა დაუკავშირდა პენიტენციურ სამსახურს.
