კუბაში ანტისამთავრობო აქციებზე ათობით ადამიანი დააკავეს. ბოლო ათწლეულების მანძილზე ქვეყანაში ყველაზე მასშტაბური საპროტესტო ტალღა დაიწყო.
პროტესტი ძლიერმა ეკონომიკურმა კრიზისმა, საკვების და მედიკამენტების დეფიციტმა, ფასების ზრდამ, კორონავირუსის ვაქცინების მიუწვდომლობამ და პანდემიის არაეფექტიანმა მართვამ გამოიწვია.
დემონსტრაციები ქვეყნის მასშტაბით სხვადასხვა ქალაქებში, მათ შორის დედაქალაქ ჰავანაში იმართება. აქციებზე ისმის ლოზუნგები, "თავისუფლება", "ძირს დიქტატურა", "ძირს კომუნიზმი".
"არ გვეშინია, ცვლილებები გვინდა, აღარ გვინდა დიქტატურა". – უთხრა BBC-ს აქციის ერთერთმა მონაწილემ.
დემონსტრანტების დაკავებისას უშიშროების ძალები და პოლიცია დაკავებულებს სცემდა და მათ წინააღმდეგ წიწაკის სპრეის იყენებდა. სამართალდამცველებთან დაპირისპირებაში დაშავდა Associated Press-ის ჟურნალისტი.
გავრცელებული ინფორმაციით, ქვეყნის სხვადასხვა ადგილას ინტერნეტი გაითიშა.
დემონსტრაციების საპასუხოდ კუბის პრეზიდენტმა მიგელ დიას-კანელმა მოსახლეობას სიტყვით მიმართა და არეულობაში აშშ დაადანაშაულა. კუბაზე დაწესებულ სხვადასხვა სანქციების მან "ეკონომიკური დახრჩობის პოლიტიკა" უწოდა. დიას-კანელის თქმით დემონსტრანტებს აშშ-ს მიერ დაქირავებული მებრძოლები არიან, რომელთა მიზანიც კუბის დესტაბილიზაციააა. თავის მხარდამჭერებს მას "რევოლუციის" დაცვისკენ და დემონსტრანტების წინააღმდეგ გამოსვლისკენ მოუწოდა. (იგულისხმება 1959 წლის კომუნისტური რევოლუცია)
"ბრძლის ბრძანება გაცემულია, რევოლუციონერებო ქუჩაში!" - გამოაცხადა დიას-კანელმა.
კუბაში მიმდინარე მოვლენებს აშშ გამოეხმაურა და კუბელ ხალხს მხარდაჭერა გამოუცხადა.
"ჩვენ კუბელი ხალხის გვერდით ვართ, მაშინ როცა ისინი თავიანთ ფუნდამენტურ და საყოველთაო უფლებებს ითხოვენ, ითხოვენ თავისუფლებას და შვებას პანდემიის ტრაგიკული გავლენსიგან და ათწლეულობით გაგრძელებული რეპრესიებისა და ეკონომიკური გაჭირვებისგან" - თქვა აშშ-ს პრეზიდენტმა ჯო ბაიდენმა.
საპირისპიროდ ვენესუელის ლიდერმა ნიკოლას მადურომ სრული მხარდაჭერა გამოუცხადა კუბის პრეზიდენტს და კუნძულის "რევოლუციურ მთავრობას". კუბის ხელისუფლება მადუროს ახლო მოკავშირეა. მექსიკის და რუსეთის განცხადებით, კუბის შიდა საქმეებში სხვა სახელმწიფოები არ უნდა ჩაერიონ.