მთავრობა ხუდონჰესის ინვესტორ კომპანიასთან კონტრაქტს წყვეტს და მომავალში ჰესის სახელმწიფოს მიერ აშენებასაც განიხილავს. როგორც ეკონომიკის მინისტრმა, ნათია თურნავამ მთავრობის სხდომაზე თქვა, კონტრაქტის შეწყვეტის მიზეზი არის ის, რომ კომპანიამ უკვე 10 წლის განმავლობაში ვერ შეძლო პროექტის განხორციელება და პირველ ეტაპზე კომპანიისთვის გადაცემული აქტივების სახელმწიფოსთვის დაბრუნება იგეგმება.
"განსაკუთრებული არაფერი ხდება, 2011 წელს იყო დადებული შეთანხმება ინდურ კომპანია Trans Electric-თან ხუდონჰესის განვითარებასთან დაკავშირებით, ობიექტური თუ სუბიექტური მიზეზების გამო, ვხედავთ, რომ 10 წელი გავიდა ამის შემდეგ და ეს პროექტი ვერ განხორციელდა, რა თქმა უნდა, აქ არ არის მაინცდამაინც ერთი კონკრეტული მიზეზი კომპანიის მხარეს, აქ არის ნაკრები სხვადასხვა მიზეზებისა, მათ შორის, პროექტის სირთულე და აქედან გამომდინარე, ჩვენ მივიღეთ გადაწყვეტილება 1 წლის წინ, რომ საერთაშორისო კონსულტანტის დახმარებით ჩვენ მოველაპარაკოთ, შევუთანხმდეთ ინდურ ინვესტორს, რომ მოვშალოთ თანდათან ეს შეთანხმება, რომელიც ჩვენ შორის იყო დადებული.
რა თქმა უნდა, აქ რომ იყოს მარტო მათი ბრალეულობა, ჩვენ უბრალოდ ხისტად წავიდოდით ამ კონტრაქტის მოშლაზე, მაგრამ, ვინაიდან ობიექტური და სუბიექტური მიზეზები ორივე მხარეს არის, მათ შორის, ისევ და ისევ ვამბობ, მოსახლეობის თემა, პროექტის სწორი სტრუქტურირება და ა.შ. ორივე მხარემ მივიღეთ გადაწყვეტილება, ვიმუშაოთ იმაზე, რომ ურთიერთშეთანხმებით მოხდეს ამ პროექტის და იმ აქტივების, რაც გადაცემული იყო ინდუსებისთვის, სახელმწიფოსთვის დაბრუნება". – თქვა ეკონომიკის მინისტრმა.
თურნავას თქმით, ბოლო დროის მოვლენებმა აჩვენა, რომ მსგავს პროექტებში სახელმწიფო უფრო მეტად უნდა ჩაერთოს და ჰესის ერთადერთი მფლობელი თუ არა, კომპანიის პარტნიორი მაინც უნდა გახდეს.
"ინვესტორს ინტერესი აღარ აქვს, იმიტომ, რომ 10 წლის განმავლობაში მანაც ეს ვერ განახორციელა, აქ სხვა მიდგომა იქნება საჭირო. პირველ ეტაპზე, ჩვენ კონსულტანტების დახმარებით, ვისთანაც ვახანგრძლივებთ წლის ბოლომდე საკონსულტაციო შეთანხმებას, ვიზრუნებთ იმაზე, რომ აქტივები და პროექტი დაუბრუნდეს სახელმწიფოს, შემდეგ კი ვიმსჯელებთ იმაზე, თუ რა სტრუქტურით არის უმჯობესი ამ სტრატეგიული პროექტის განხორციელება. ბოლო დროის მოვლენებმა დაგვანახა, რომ მსგავსი ტიპის მეგაპროექტების განხორციელებაში სახელმწიფომ უნდა მიიღოს მეტი მონაწილეობა და გახდეს თუ ერთადერთი მფლობელი არა, პარტნიორი მაინც". – თქვა ნათია თურნავამ.
ინდურ კომპანიასთან ხელშეკრულების გაუქმების მიზნით, ეკონომიკის სამინისტრომ საერთაშორისო იურიდიული კომპანია Hogan Lovells, დაახლოებით, 1 წლის წინ დაიქირავა. სამინისტრომ კონტრაქტი წლის ბოლომდე გაახანგრძლივა.
ხუდონჰესის საინვესტიციო მოცულობა დაახლოებით 1 მილიარდი დოლარი იყო.
მთავრობამ Trans Electric-სა და კომპანიის ქართულ ფილიალთან ხელშეკრულება თავდაპირველად 2011 წელს გააფორმა. შეთანხმება მდინარე ხუდონზე 702 მეგავატიანი ჰესის მშენებლობას ითვალისწინებდა.
მოგვიანებით ხელშეკრულებაში ცვლილება შევიდა, რომლის მიხედვითაც, მთავრობა წინასწარ დადგენილი ფასით, სადგურისგან ელექტროენერგიას მომდევნო 15 წლის განმავლობაში შეიძენდა.
