ჰონგ-კონგში ყველაზე მსხვილი პროდემოკრატიული გაზეთი Apple Daily იხურება. გასულ კვირას გამოცემის ოფისებში რეიდი მოეწყო, რაც დაკავშირებულია ბრალდებებთან, რომ გაზეთის საქმიანობა ჰონგ-კონგის ეროვნული უშიშროების კანონს არღვევს.
რეიდის შემდეგ კომპანიასთან დაკავშირებული ანგარიშები გაყინეს. პოლიციამ ასევე დააკავა გამოცემის მთავარი რედაქტორი და ხუთი აღმასრულებელი პირი.
Daily Apple აქტიურად აკრიტიკებდა ჰონგ-კონგისა და ჩინეთის მმართველობას, უშიშროების კანონის მიღებას და წნეხს ჰონგ-კონგის დემოკრატიულ მოძრაობაზე.
Daily Apple-ის სარედაქციო ჯგუფმა დახურვის გადაწყვეტილება თანამშრომლების უსაფრთხოების უზრუნველყოფისთვის მიიღო. გამოცემა მუშაობას 23 ივნისს, შუაღამისას შეწყვეტს.
Amnesty International-ის შეფასებით, გამოცემის დახურვა "ჰონგ-კონგის უახლეს ისტორიაში მედიის თავისუფლებისთვის ყველაზე შავი დღეა".
"მთავრობამ გაზეთი კრიტიკული სტატიების გამოქვეყნებისთვის და ჰონგ-კონგის საკითხის საერთაშორისო გამოხმაურებების გაშუქებისთვის დახურა. ეს არის მიუღებელი თავდასხმა გამოხატვის თავისუფლებაზე". – ნათქვამია ორგანიზაციის განცხადებაში.
გარდა ამისა, გამოცემის დამფუძნებელი ჯიმი ლაი სხვადასხვა ბრალდებებით არის დაკავებული, რომელთა შორისაა 2019 წელს არაავტორიზებულ შეკრებაში მონაწილეობა. მედია მაგნატი ჰონგ-კონგის პროდემოკრატიული პროტესტის ერთ-ერთი ყველაზე აქტიური მხარდამჭერი იყო.