ბოდბელი ეპისკოპოსის მეუფე იაკობის თქმით, ნინოწმინდის პანსიონთან დაკავშირებული შეხვედრა სახალხო დამცველთან, "გულღია და გულითადი იყო".
ისინი შეთანხმდნენ, რომ მომავალ კვირას პანსიონში ერთად ჩავლენ.
"ჩვენ გვქონდა ძალიან გულღია, გულითადი საუბარი, მიმოვიხილეთ ის პრობლემები, რაზეც იყო საუბარი და, ზოგადად, სიტუაცია. შევთანხმდით იმაზე, რომ სახალხო დამცველი და მე, ალბათ, შემდეგი კვირის ბოლოს, ერთად ჩავალთ პანსიონში, იქ ვნახავთ სიტუაციას და ამის შემდეგ, როცა გვეტყვიან, რომ
თქვენ გთხოვთ, ჟურნალისტებს, იქ ალყა რომ გაქვთ დარტყმული, დიდი სტრესია ბავშვებისთვის და ვერ გამოდიან სტრესიდან, მოგვეცით საშუალება, რომ მოვამზადოთ, რაც შეიძლება სწრაფად შევიდნენ, თქვენ თუ არ დასტრესავთ". - ამბობს მეუფე იაკობი.
მან ჟურნალისტებს მოუწოდა, რომ არ მივიდნენ პანსიონთან და არ შექმნან დაძაბულობა.
"ჩვენ მართლაც გულითადი საუბარი გვქონდა. პრეტენზიები და რამე არ ყოფილა, სიტუაცია უცბად შეიქმნა, აგორდა და აქ მტყუან-მართალზე არ იყო საუბარი, უბრალოდ, ჩვენ ვცდილობთ, რომ ბავშვების საუკეთესო ინტერესები გავითვალისწინოთ და დროზე დავამთავროთ ასეთი დაძაბული სიტუაცია. თქვენ, ჟურნალისტები თუ აღარ დაგვიძაბავთ იქ, ძალიან სწრაფად შევლენ.
ალყა რომ გაქვთ ყიზილბაშებივით შემორტყმული, ბავშვები გუშინ გეუბნებოდნენ წადით-წადითო, თქვენ გამო ვერ გამოვდივართ გარეთო, რატომ უშლით ნერვებს ბავშვებს?!". - ამბობს მეუფე იაკობი.
მეუფე იაკობსა და სახალხო დამცველს შორის შეხვედრა დღეს, 17 ივნისს გაიმართა.
როგორც შეხვედრის დასრულების შემდეგ სახალხო დამცველმა ნინო ლომჯარიამ თქვა, მეუფე იაკობთან ბევრ საკითხზე იყო თანხმობა და მომავალ კვირას ერთად ჩავლენ პანსიონში.
5 ივნისს სასამართლომ PHR-ის მოთხოვნა ნინოწმინდის პანსიონიდან ბავშვების გაყვანის შესახებ დააკმაყოფილა. ორგანიზაციის ხელმძღვანელის, ანა აბაშიძის თქმით, ბავშვების დაწესებულებიდან გაყვანა დაუყოვნებლივ უნდა დაიწყოს. გადაწყვეტილება მოსამართლე ივანე ღლონტმა მიიღო.
PHR-ის წარმომადგენელი, ანა არგანაშვილი განმარტავს, რომ კანონმდებლობით ორგანიზაციისთვის განსაზღვრული სპეციალური მოსარჩელის სტატუსიდან გამომდინარე, განაჩენში არსებობს ტექნიკური ჩანაწერი პანსიონიდან მხოლოდ შშმ ბავშვების გაყვანის შესახებ, მაგრამ, მისივე თქმით, თუ პანსიონში საფრთხე არსებობს, რომელზეც მოსამართლეც საუბრობს, არ შეიძლება იქ რომელიმე ბავშვი დარჩეს.
საქართველოს საპატრიარქომ ნინოწმინდის ბავშვთა პანსიონთან დაკავშირებით, რომელიც მის დაქვემდებარებაშია, განცხადება გაავრცელა. საპატრიარქო აღნიშნავს, რომ ისინი გაასაჩივრებენ სასამართლოს იმ გადაწყვეტილებას, რომლითაც PHR-ის მოთხოვნა პანსიონიდან ბავშვების დაუყოვნებლივ გამოყვანის შესახებ დაკმაყოფილდა.
ჯანდაცვის სამინისტროს ინფორმაციით, ნინოწმინდის ბავშვთა პანსიონიდან 20 არასრულწლოვანი ალტერნატიულ სერვისებში გადაანაწილეს, მათ შორის, 7 შეზღუდული შესაძლებლობების მქონე ბავშვია.
გაერთიანებული ერების სააგენტოთა ჯგუფი საქართველოში ნინოწმინდის ბავშვთა პანსიონთან დაკავშირებით განცხადებას ავრცელებს. ორგანიზაცია გმობს ნებისმიერ მცდელობას, რომელიც ხელს უშლის სახალხო დამცველის აპარატისა და ქვეყნის სხვა შესაბამისი უწყებების მხრიდან თავიანთი მოვალეობების შესრულებას.
ორგანიზაცია ასევე გმობს ბავშვთა მიმართ ნებისმიერი სახის ძალადობას და სასტიკად მოპყრობას და იმედოვნებს, რომ 5 ივნისის სასამართლო გადაწყვეტილება ბავშვთა სახლიდან შეზღუდული შესაძლებლობების მქონე ბენეფიციარების გაყვანის შესახებ იქ მყოფ ყველა ბავშვზე გავრცელდება.
4 ივნისს სხალთის ეპარქიამ ნინოწმინდის ბავშვთა პანსიონის ბენეფიციარების ამსახველი ვიდეოჩანაწერი სოციალურ ქსელში გაავრცელა. ვიდეოში მონაწილე არასრულწლოვანების იდენტიფიცირება სრულად არის შესაძლებელი.
ფაქტს გამოეხმაურა სახალხო დამცველიც და სახელმწიფო უწყებებს პანსიონში მყოფი არასრულწლოვნების უფლებადარღვევის განგრძობად ფაქტზე დაუყოვნებლივი რეაგირებისკენ მოუწოდა. ფაქტის შესწავლა დაიწყო სახელმწიფო ინსპექტორის სამსახურმაც.
2 ივნისს სახალხო დამცველმა, ნინო ლომჯარიამ თქვა, რომ ნინოწმინდის ბავშვთა პანსიონთან დაკავშირებით გამოძიება სავარაუდო გაუპატიურებაზეც არის დაწყებული. 3 ივნისს, საქართველოს საპატრიარქოს საზოგადოებასთან ურთიერთობის სამსახურმა განცხადება გაავრცელა და შსს-ს შესაბამის სამსახურს მიმართა, ბავშვთა სახლთან დაკავშირებული საქმეები გაესაჯაროებინა.
მოგვიანებით, შინაგან საქმეთა სამინისტრომ გაავრცელა განცხადება, რომ ნინოწმინდის პანსიონის საქმეში დანაშაულის დასადგენად საკმარისი მტკიცებულებები არ არის. განცხადების თანახმად, 2016 წლიდან დღემდე გამოძიება სისხლის სამართლის 4 საქმეზე მიმდინარეობს, თუმცა, ამ ეტაპზე, საქმეში არ არის საკმარის მტკიცებულებათა ის სტანდარტი, რომლითაც დადგინდება შესაძლო დანაშაულის ჩადენის ფაქტი.
